İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 871 Hüküm no: 1067 Orijinal metin no: [149b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Halife b. Mehmed’in Müderris Mehmed Efendi’den ödünç aldığı Hüccet-i istiğlâl, 1.450. Husûs-ı âti’l-beyânın mahâllinde tahrîri iltimâs olmağın savb-ı şer‘-i mutahhardan Mevlânâ Ahmed Efendi irsâl olunup ol dahi mahmiye-i İstanbul’da Mimar Sinan mahallesinde efdalü efâdılı’l-müderrisîni’l-kirâm ekmelü’l-kâmili’l-muhakkıkīni’l-fihâm Seyyid Mehmed Efendi b. el-merhûm Seyyid Mehmed Efendi’nin sâkin olduğu menziline varıp zeyl-i vesîkada isimleri mastûr olan Müslimîn huzûrunda meclis-i şer‘-i şerîf etdikde mahmiye-i mezbûrede el-Hâc Bayram mahallesinde sâkin Başmuhâsebe hulefâsından Ahmed Halîfe b. Mehmed meclis-i ma‘kūd-ı mezbûrda mûmâ-ileyh Seyyid Mehmed Efendi mahzarında ikrâr ve i‘tirâf edip silk-i mülkümde münselik olup zikrolunan el-Hâc Bayram mahallesinde vâki‘ bir tarafdan Râziye Hatun mülkü ve bir tarafdan Hasan Çelebi ve Mehmed Çelebi ibney Sefer mülkü ve bir tarafdan Mustafa Çorbacı mülkü ve bir tarafdan tarîk-i âm ile mahdûd menzilimi mûmâ-ileyh Seyyid Mehmed Efendi’ye her biri yedişer dirhem olmak üzere bin dört yüz elli riyâlî guruşa bi-tarîkı’l-istiğlâl bey‘ ve teslîm ol dahi iştirâ ve kabûl ve kabz eyledikden sonra semeni olan meblağı yedinden tamamen ahz u kabz edip menzil-i mahdûd-ı mezbûru ba‘de’t-tahliyeti’ş-şer‘iye ve’t-tekābuzi’ş-şer‘î târih-i kitâbdan dokuz ay tamamına değin mûmâ-ileyh Seyyid Mehmed Efendi’den yine her biri yedişer dirhem olmak üzere elli riyâlî guruşa istîcâr ve kabûl edip ol dahi îcâr ve teslîm eyledi dedikde gıbbe’t-tasdîk menzil-i mezbûrun derkine ve ücret-i lâzımesine yine Başmuhâsebe hulefâsından hazır bi’l-meclis Mustafa Halîfe b. Ali kefîl olmağın vâki‘ hâli mevlânâ-yı mezbûr mahâllinde tahrîr ba‘dehû irsâl olunan Mustafa b. İsa ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb [olundu.] Fî-gurreti Muharremi’l-harâm li-sene selâse ve seb‘în ve elf. Şuhûdü’l-hâl: Salih Efendi b. Mehmed, Fahrü’l-müderrisîn Ahmed Efendi b. Seyyid Veli?, Abdülkadir Efendi el-müezzin, Salih Efendi el-imâm, Mustafa Beşe, Mustafa Efendi el-kādî, Şaban Efendi b. Hasan.