İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 872 Hüküm no: 1068 Orijinal metin no: [149b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahya Efendi’nin menzilini aldığı borç karşılığında Kara Çelebizâde Mahmud Efendi Medresesi Vakfı’na rehin verdiği Rehin hüccetidir. Yahya Efendi. Husûs-ı âti’l-beyânın mahâllinde tahrîri iltimâs olmağın savb-ı şerden Mevlânâ Mehmed Efendi irsâl olunup ol dahi Dârü’l-hilafeti’l-aliyye Kostantıniyyeti’l-mahmiye’de Kirmasti mahallesinde sâbıkā Yenişehir kādısı olan a‘lemü’l-ulemâ’i’l-izâm efdalü’l-fudalâi’l-fihâm yenbû‘u’l-fezâil ve’l-meâli metbû‘i’l-efâzıl ve’l-e‘âlî Yahya Efendi’nin sâkin oldukları menzil-i âlîlerine varıp zeyl-i vesîkada isimleri mastûr olan Müslimîn huzûrunda akd-i meclis-i şer‘ eyledikde mûmâ-ileyh Yahya Efendi meclis-i ma‘kūd-ı mezbûrda merkūm Kara Çelebizâde Mahmud Efendi Medresesi’nin vakfına hâlâ mütevellî olan işbu bâ‘isü’l-kitâb Cafer Çavuş b. Mehmed mahzarında ikrâr ve takrîr-i kelâm edip merkūm Cafer Çavuş yedinden mal-ı vakf-ı mezbûrdan iki bin dört yüz riyâlî guruş istikrâz kabz edip ve târih-i kitâbdan üç yüz altmış gün tamamına değin mü’eccel ve mev‘ûd devr-i şer‘î ile üzerime iltizâm olunan ribhden dahi yüz elli riyâlî guruş ki cem‘an vakf-ı mezbûra iki bin beş yüz elli riyâlî guruş deynim olup meblağ-ı mezbûr mukābelesinde Yoros kazâsına tâbi‘ Kanlıca nâm karyede vâki‘ silk-i mülkümde münselik olup bir tarafı Lankazâde Abdullah Ağa mülküne ve bir tarafı vâdi ve bir tarafı sâhil-i bahr ve bir tarafı tarîk-i âmma müntehî dâhiliye ve hâriciye büyût-ı adîdeyi müştemil menzilime ba‘de’t-tahliyeti’ş-şer‘iye mütevellî-i mersûm Cafer Çavuş’a rehin vaz‘ ve teslîm edip ol dahi irtihân ve kabz eyledi dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb keteb olundu. Fî-gurreti Muharremi’l-harâm li-sene selâse ve seb‘în ve elf. Şuhûdü’l-hâl: Umdetü’l-müderrisîni’l-kirâm Abdülbaki Efendi, Mefharu’l-müderrisîni’l-fihâm İshak Efendi, Zübdetü’l-kuzât Mustafa el-kādî bi-Malatya, Zağarcı Ali Ağa b. Abdullah, es-Seyyid Abdülkerim b. Seyyid Süleyman, Musa Efendi b. Nasuh el-imâm, Ebûbekir Beşe b. Şaban çukadâr-ı efendi hazretleri.