İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 873 Hüküm no: 1070 Orijinal metin no: [150a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Navluncu Mehmed b. Musa ve Murad b. Yusuf’un paralarıyla aldıkları köleleri ve malı sahiplerine iade etmeleri için Receb b. Mustafa ve Dursun b. Şaban’a tembihte bulunulduğu Hüccet-i ikrâr-ı gulâm. Navluncu tâifesinden işbu râfi‘ayi’l-kitâb Mehmed b. Musa ve Murad b. Yusuf nâm kimesneler meclis-i şer‘-i hatîrde yine tâife-i mezbûreden Receb b. Mustafa ve Dursun b. Şaban nâm kimesneler mahzarlarında bundan akdem mezbûrâna sekiz yüz otuz esedî guruş teslîm ve sefîne ile Bafra’ya varıp ondan kendir ve ketân tohumu ve nohud iştirâ etmeleri için tarafımızdan mezbûrânı vekîl nasbeylemişdik hâlâ meblağ-ı mezbûrdan yüz yirmi esedî guruşunu bize teslîm edip bâkī yedi yüz on guruşu taleb ederiz suâl olunsun dediklerinde gıbbe’s-suâl mezbûrân Receb ve Dursun cevâblarında fi’l-vâki‘ müdde‘iyân-ı mezbûrânın yedlerinden sekiz yüz otuz esedî guruşu tesellüm ve kabz eylediklerin ve meblağ-ı mezbûr ile bi’l-vekâle Kefe’den Rende, Şahin ve Laçin ve Hasan ve Kaytas ve İvaz ve Şehbaz nâm Rusiyyü’l-asl yedi re’s gulâm ve bir re’s sagīre câriye ve iki yedek yağ aldık deyü ikrâr eylediklerinde alâ-mûceb-i ikrârihimâ müdde‘iyân-ı mezbûrâna malları ile iştirâ eyledikleri mârrü’z-zikr yedi re’s gulâm ve bir re’s câriye ile iki yedek yağı teslîme mezbûrân Receb ve Dursun’a tenbîh birle mâ-vaka‘a bi’t-taleb ketb olundu. Fî-gurreti Muharremi’l-harâm li-sene selâse ve seb‘în ve elf. Şuhûdü’l-hâl: el-Hâc Osman b. Ali, Mehmed Reis b. Şaban, Musa b. Mehmed, Mustafa b. Musa, Şaban Beşe b. Uğur, Mehmed Halîfe b. Mustafa.