İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 874 Hüküm no: 1071 Orijinal metin no: [150a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sitti Hatun Vakfı’na ait arsa üzerine Raziye Hatun’un bina yapmasına izin verildiği Hüccet-i îcâr-ı nıkz-ı mevcûd ba‘de’l-keşf. Mahmiye-i İstanbul’da Kazgancı mahallesinde vâki‘ Sitti Hatun nâm sahibetü’l-hayrın vakıf ve gallesi mahalle-i mezbûre mescidinin imâmına şart etdiği lede’l-ahâlî ma‘lûmü’l-hudûd vakıf menzilin mütevellîsi olan Mehmed Efendi b. Ahmed meclis-i şer‘a gelip bi’t-tevliye takrîr-i kelâm edip menzil-i mezbûr bin yetmiş Zilka‘de’sinde vâki‘ harîkde muhterik olup arsa-i sırfa kaldıkda taraf-ı vâkıf da ve meşrûtun-leh olan kimesne de bî-kudret ve müsâ‘id-i binâ olmayıp bu kadar zaman arsa-i mezbûreyi icâre-i mu‘accele ba‘de’t-takdîr ecr-i misli olan ücret-i mü’eccele ile istîcar, mülkü olmak üzere nefsi için mâlıyla binâya râgıbe olup ondan gayrı tâlib ve mu‘accelesine mahsûb olmak üzere binâya râgıb bulunmamağla hâlâ arsa-i mezbûrenin üzerine varılıp nıkz-ı mevcûdu ba‘de’l-keşf ve’n-nazar tahmîn ve takvîm ve ecr-i misli ta‘yîn ve takdîr olunmasın tevliyeti hasebiyle taleb ederin dedikde savb-ı şer‘den bu fakīr ve hâssa mi‘mârlardan Üstâd Ahmed b. Ahmed zeyl-i kitâbda muharrerü’l-esâmî olan Müslimîn ile arsa-i mezbûrenin üzerine varılıp mezbûre Râziye Hatun mahzarında ba‘de’l-keşf ve’l-müşâhede mi‘mâr-ı mezbûr nıkz-ı mevcûduna bin akçe tahmîn ve takvîm ve mecmû‘-ı arsası üç yüz doksan dokuz zirâ‘ olup el-yevm ecr-i misli beher yevm birer akçedir deyü ta‘yîn ve takdîr edip ve sâir Müslimîn dahi icmâ‘ ve ittifak etdiklerinde mütevellî-i mezbûr Mehmed Efendi nıkz-ı mezbûrun kıymeti olan meblağ-ı mezbûru merkūme Râziye Hatun yedinden bi’t-tevliye vakıf için ahz u kabz etdikden sonra arsa-i mezbûreyi bin akçe icâre-i mu‘accele ve beher yevm birer akçe ücret-i mü’eccele ile mezbûre Râziye Hatun’a tevliyetim hasebiyle îcâr ve mülkü olmak üzere nefsi için binâya izin verip ol dahi vech-i meşrûh üzere istîcâr ve kabûl etmeğin mâ-vaka‘a bi’t-taleb ketb olundu. Fî evâhiri Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Receb Efendi b. Şaban, Osman b. Veli, Şaban Beşe b. Abdullah, Fethullah Çelebi b. Ahmed, Ahmed Çelebi b. Ali, Yusuf Çelebi b. Abdullah.