İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 875 Hüküm no: 1072 Orijinal metin no: [150a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani bt. Mehmed’in muhâlaa yoluyla kocası Mehmed Çelebi’den boşandığı Muhâla‘a. Mahmiye-i İstanbul’da Hoca Hayreddin mahallesinde sâkine Ümmühani bt. Mehmed nâm hatun meclis-i şer‘-i hatîrde zevci işbu bâ‘isü’l-kitâb Mehmed Çelebi b. ( ) mahzarında bi-tav‘ihâ ikrâr ve takrîr-i kelâm edip zevcim mezbûr Mehmed Çelebi zimmetinde mütekarrir ve ma‘kūdün-aleyh olan dört bin akçe mehr-i mü’eccelim üzerine ve nafaka-i iddet-i ma‘lûmem ve me’ûnet-i süknâm dahi kendi üzerime olmak üzere mezbûr Mehmed Çelebi ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl eyledikden sonra zevciyete müte‘allika da‘vâdan her birimiz âharın zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledik dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’s-sânî min-Muharremi’l-harâm li-sene selâse ve seb‘în ve elf. Şuhûdü’l-hâl: Mustafa b. İsa, Pîrî b. Hasan, Yusuf Beşe b. Abdullah, Bosnevî Mehmed Beşe, Resûl b. Rıdvan, Süleyman Çelebi b. ( ).