İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 875 Hüküm no: 1073 Orijinal metin no: [150a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bozacı Mehmed Beşe’nin ölen ortağı Bozacı Nikola’nın yarım bozahane hissesini varislerine teslimine hükmolunduğu Verâset hüccetidir. Bozacı tâifesinden olup bundan akdem hâlik olan Nikola nâm zimmînin sulbî kebîr oğulları ve fukarâ vârisleri olan Koçı ve Madro nâm zimmîler meclis-i şer‘-i hâtirde mahmiye-i İstanbul’da Davudpaşa kurbünde vâki‘ iki bâb bozahânelerin müste’ciri olan Mehmed Beşe b. Ali mahzarında üzerine da‘vâ-yı takrîr edip mûrisimiz hâlik-i mezbûr merkūm Mehmed Beşe ile zikrolunan bozahânelerde bozacılık san‘atında şerîkli olup zikrolunan bozahânelerde mevcûd bozacı âlâtının nısfı babamız hâlik-i mezbûrun ve nısf-ı âharı mezbûr Mehmed Beşe’nin mülkü olup babamız mezbûr hâlik olmağla nısf hissesi ırsen bize isâbet ve intikāl etmiş iken mezbûr Mehmed Beşe âlât-ı mezbûrenin nısfına nâ-hak vaz‘-i yed eder suâl olunup kasr-ı yedine tenbîh olunmak murâdımızdır dediklerinde gıbbe’s-suâl mezbûr Mehmed Beşe kazıyye bâlâda tafsîli mürûr etdiği vech üzere olduğunu bi-tav‘ihimu‘terif olmağın mûcebince âlât-ı mezbûrenin nısfından kasr-ı yedine mezbûr Mehmed Beşe’ye tenbîh olunup ma vaka‘a bi’t-taleb ketb olundu. Fî-gurreti Muharremi’l-harâm li-sene selâse ve seb‘în ve elf. Şuhûdü’l-hâl: Hasan Beşe kethudâ-yı bozacıyân, Mehmed b. Hamza, Ali Beşe b. Hüseyin, Ahmed b. ( ) el-cündî, Mehmed Beşe b. Aydın.