İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 876 Hüküm no: 1074 Orijinal metin no: [150a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. İbrahim’in muhâlaa yoluyla kocası Hasan Ağa b. Yusuf’dan boşandığı Muhâla‘a, ibrâ. Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Ahmed Efendi irsâl olunup ol dahi mahmiye-i İstanbul’da Taşcı Mustafa Bey mahallesinde Hasan Ağa b. Yusuf’un sâkin olduğu menzile varıp zeyl-i rakīmde isimleri mastûr olan Müslimîn huzûrunda akd-i meclis-i şer‘-i hatîrde merkūm Hasan Ağa’nın zevcesi olup zâtı Mehmed Ağa b. Ahmed ve Mehmed Hoca b. Hüseyin ta‘rîfleri ile mu‘arrefe olan Âişe Hatun bt. İbrahim meclis-i ma‘kūd-ı mezbûrda işbu bâ‘isü’r-rakīm merkūm Hasan Ağa mahzarında ikrâr ve i‘tirâf edip zevcim mezbûr Hasan Ağa zimmetinde mütekarrir ve ma‘kūdün-aleyh olan otuz bin akçe mehr-i mü’eccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzere muhâla‘a-i sahîha-i şer‘iye ile zevcim mezbûr Hasan Ağa ile muhâla‘a-i edip ol dahi hul‘-ı mezbûru kabûl eyledikden sonra zevciyete ve gayra müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ ile ibrâ ve ıskāt eyledik dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Muharrem b. Mehmed ile meclis-i şer‘a gelip alâ-vukū‘ihî inhâ ve takrîr etmeğin ma vaka‘a bi’t-taleb ketb olundu. Fi’l-yevmi’s-sâlis min-Muharremi’l-harâm li-sene selâse ve seb‘în ve elf. Şuhûdü’l-hâl: Hasan Beşe b. Mustafa, Muharrem b. Abdullah, Mustafa odabaşı, Mehmed Ağa b. ( ), Yusuf el-müezzin, Mehmed Ağa b. Ahmed, Mehmed b. Hüseyin.