İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 876 Hüküm no: 1075 Orijinal metin no: [150b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Receb b. Hacı Halife’nin Çoban Yusuf b. Esed tarafından sopa ile dövüldüğü Darb hüccetidir. Mahmiye-i İstanbul’da Tahtakal‘a kurbünde sâkin Receb b. Hacı Halîfe nâm kimesne mahfil-i kazâda koyun çobanı tâifesinden Yusuf b. Esed nâm kimesne mahzarında üzerine da‘vâ ve takrîr-i kelâm [edip] târih-i kitâbdan bir gün mukaddem Odunkapısı kurbünde vakt-i asırdan sonra mezbûr Yusuf sol koluma ve sol yanıma toyaka ta‘bîr olunur asâ-yı kebîr ile bir kerre darb edip dirseğimde ve zahrımda kara-bere eylemişdir suâl olunsun dedikde gıbbe’s-suâl ve’l-inkâr müdde-i mezbûrdan müdde‘âsını mübeyyine beyyine taleb olundukda udûl-i Müslimînden Odunkapısı kurbü sâkinlerinden el-Hâc Yusuf b. Abdullah ve Mehmed Çelebi b. Sıyami nâm kimesneler li-ecli’ş-şehâde meclis-i şer‘a hâzırân olup isre’l-istişhâd fî’l-hakīka Odunkapısı kurbünde vakt-i asırdan sonra bizim huzûrumuzda mezbûr Yusuf müdde‘î-i merkūm Receb’in sol yanına ve sol koluna toyaka ta‘bîr olunur asâ-yı kebîr ile bir kerre darb edip dirseğinde ve zahrında kara-bere eyledi biz bu husûsa vech-i meşrûh üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mâ hüve’l-vâki‘ bi’t-taleb ketb olundu. Fi’l-yevmi’s-sânî mine’l-Muharremi’l-harâm li-sene selâse ve seb‘în ve elf. Şuhûdü’l-hâl: el-Hâc Said b. Süleyman, el-Hâc Ali b. el-Hâc İsa, Abdülkerim Çelebi b. Abdülcabbar, Ali Çelebi b. Hızır, Abdi Çelebi b. Hüseyin.