İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 877 Hüküm no: 1076 Orijinal metin no: [150b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çavuş b. Mustafa’nın Kastamonu’daki yarım menzil hissesini üvey kardeşi Receb b. Mustafa’ya sattığı Bey‘ hüccetidir. Mahmiye-i İstanbul’da Beyceğiz mahallesinde sâkin Mustafa Çavuş b. Muslı (Mustafa) nâm kimesne meclis-i şer‘-i hatîr-i lâzımü’t-tevkīrde bâ‘isü’l-kitâb mezbûr Mustafa Çavuş[‘un] li-üm birâderi Receb b. Mustafa nâm kimesne mahzarında ikrâr ve takrîr-i kelâm edip Vilâyet-i Anadolu’da Kastamonu kasabasında Cibril mahallesinde vâki‘ bir tarafdan Bey Hamamı’na ve bir tarafdan ammim Bakkal Osman menziline ve bir tarafdan Sıyamizâde nâm kimesne menziline ve taraf-ı râbi‘i tarîk-i âmma müntehî bir beyt-i süflî ve bi’r-i mâyı ve zât-ı eşcâr-ı müsmire ve gayr-ı müsmireyi müştemil mülk menzilimin taraf-ı şarkīsinde hâlâ babam mezbûr Mustafa’yı iskân eylediğim nısf-ı mukarrerini bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık tarafeynden îcâb [ve] kabûlü hâvî bey‘-ı bâtt-ı sahîh-i şer‘î ile iki bin beş yüz fıddî râyic fi’l-vakt akçeye birâderim mezbûr Receb’e bey‘ ol dahi ber-minvâl-i muharrer iştirâ ve kabûl eyledikden sonra semeni olan meblağ-ı mezbûr iki bin beş yüz akçeyi yedinden tamamen alıp kabz edip mebî‘-i mezbûru mahâllinde kabz ve tasarrufa mezbûr Receb’i taslît eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min-Muharremi’l-harâm li-sene selâse ve seb‘în ve elf. Şuhûdü’l-hâl: Mustafa Çelebi b. Mehmed el-müezzin, Ali b. Ahmed, İbrahim b. Veli, Mehmed b. Bayram, Abdi b. Hüseyin.