İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 877 Hüküm no: 1077 Orijinal metin no: [150b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. Abdullah’ın bazı eşyalarını Hayatî bt. Abdullah’a hibe edip öldükten sonra da kendisine iki bin akçe verilmesini vasiyet ettiği Hîbe hüccetidir. Mahmiye-i İstanbul’da Kırkçeşme kurbünde Sekbânbaşı mahallesinde sâkine İsmihan bt. Abdullah tarafından ikrâr-ı âti’z-zikre vekîl olup mezbûrenin zâtını ma‘rifet-i şer‘iye ile ârifân Mehmed b. Müstecâb ve Receb b. Ahmed şehâdetleri ile şer‘an vekâleti sâbite olan Mustafa Beşe b. Osman meclis-i şer‘-i hatîrde işbu bâ‘isetü’l-kitâb Hayâtî bt. Abdullah tarafından sâbitü’l-vekâle vekîli olan Receb b. Ahmed el-müezzin mahzarında bi’l-vekâle ikrâr ve takrîr-i kelâm edip müvekkilem mezbûre İsmihan’ın silk-i mülk-i sahîhinde münselik olan bir minder keçesi ve bir döşeme kaliçe ve iki çarşaf ve bir kırmızı kumaş yorgan ve bir yemenî yorgan ve bir tencere ve iki sahan ve bir güğüm ve iki çuka yasdık ve iki dokuma yasdık ve bir leğen ve bir el ibriği ve bir hamam tasını müvekkile-i mezbûre Hayâtî’ye hîbe ve temlîk ol dahi meclis-i hîbede ittihâb [ve] kabûl ve kabz ve tesellüm eyledi dedikde yine vekîl-i mezbûr meclis-i mezbûrda takrîr-i kelâm edip müvekkile-i mezbûre İsmihan Hatun vefâtımdan sonra müvekkile-i mezbûre Hayâtî’ye sülüs mâlımdan iki bin akçe verile deyü vasiyyet eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis min-Muharremi’l-harâm li-sene selâse ve seb‘în ve elf. Şuhûdü’l-hâl: Kutbü’l-ârifîn eş-Şeyh Himmet Efendi, Hammâmî Ahmed Çelebi, Ali Beşe b. Habib, Sarrâc Mehmed Bey, Abdi Çelebi b. Hüseyin.