İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 878 Hüküm no: 1078 Orijinal metin no: [150b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vodinalı bazı zimmîlerin kendilerinden haksız yere para aldığını iddia ettikleri Vodina Kadısı Ahmed Efendi b. Mehmed Efendi ile sulh oldukları Sulh, ibrâ. Vilâyet-i Rumeli’nde Vodina kasabası mahallâtından Varoş mahallesi sâkinlerinden Papa Dimitri v. Fota nâm zimmî kendi tarafından asâleten ve kasaba-i mezbûre ahâlîsinden Şimo v. Piyo ve Papa Kiro v. Dimo ve Papa Velko v. Meto ve Hıristo v. Dimo ve Piyo v. Kiro ve Dimo v. Velko nâm zimmîler taraflarından husûs-ı âti’l-beyânı da‘vâ ve talebe ve lâzım gelirse sulh ve ibrâya vekîl olup Mehmed Efendi b. Şevki Mustafa ve Mesud b. Ahmed Efendi nâm kimesneler şehâdetleri ile şer‘an vekâleti sâbite olmağın vekâleten ve Mehmed Efendi b. Yusuf asâleten ve kasaba-i mezbûreye tâbi‘ Mesimer nâm karyeden Piyo v. Rani ve Diyelo v. Palo ve Hıristo v. Pelo ve İstemad v. Pasel nâm zimmîler asâleten meclis-i şer‘-i hatîr-i lâzımü’t-tevkīrde işbu bâ‘isü’l-kitâb sâbıkā Vodina kādısı olan Ahmed Efendi b. Mehmed Efendi tarafından kezâlik vech-i âtî üzere sulh ve ibrâya vekîl olup şâhidân-ı mezbûrân şehâdetleri ile şer‘an vekâleti sâbite olan Ahmed Bey b. Mustafa Çelebi nâm kimesne mahzarında her biri asâleten ve vekâleten ikrâr ve takrîr-i kelâm edip merkūm Ahmed Efendi kasaba-i mezbûrede kādı iken bizden ve müvekkillerimiz mezbûrûndan bi-gayr-ı hakkın yüz kırk bin akçemiz almışdı deyü bundan akdem taleb ve da‘vâ eylediğimizde ol dahi inkâr etmekle beynimizde münâza‘ât-ı kesîre ve muhâsamât-ı şedîde vâkı‘a olmuş idi el-hâletü hâzihî beynimizde Müslimûn ve muslihûn tavassut edip da‘vâ-yı mezbûreden bizi asâleten ve vekâleten müvekkil-i mezbûr Ahmed Efendi bizimle yedi bin akçe üzerine inşâ-i akd-i sulh eyledikde biz dahi sulh-ı mezbûru kabûl ve bedel-i sulh olan meblağ-ı mezbûru vekîl-i mezbûr Ahmed Bey yedinden tamamen ahz u kabz eyledik ba‘de’l-yevm husûs-ı mezbûra müte‘allika da‘vâdan asâleten ve vekâleten müvekkil-i mezbûr Ahmed Efendi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dediklerinde gıbbe’t-tasdîkı’ş-şer‘î vekîl-i mezbûr Ahmed Bey dahi i‘âde-i kelâm edip müvekkilim mezbûr Ahmed Efendi’nin dahi târih-i kitâba gelince mezbûrûn ile gāibûn ani’l-meclis olan Paşazâde Derviş Mehmed Çavuş ve sâir a‘yân-ı vilâyet ile asla ve kat‘a da‘vâ ve nizâ‘ı, alâka ve medhali kalmayıp zimmetleri cemî‘ de‘âvîden berîdir dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis min-Muharremi’l-harâm li-sene selâse ve seb‘în ve elf. Şuhûdü’l-hâl: Ahmed Efendi b. Saim Efendi, Mustafa Bey b. Mehmed, Mehmed Efendi b. Mustafa, Mahmud b. Mehmed, Mahmud Efendi b. Hüsameddin, Mustafa Çelebi b. Ahmed Efendi.