İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 882 Hüküm no: 1084 Orijinal metin no: [151a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ahmed’in muhâlaa yoluyla kocası Süleyman Bey b. Hüseyin’den boşandığı Mahmiye-i İstanbul’da Sarıgörez kurbünde Halîfe mahallesinde sâkine Âişe Hatun bt. Ahmed tarafından vech-i âtî üzere hul‘ ve ibrâya vekîl olup mezbûrenin zâtını ma‘rifet-i şer‘iye ile ârifân olan Şaban Efendi b. Osman ve Mehmed b. Receb şehâdetleri [ile] şer‘an vekâleti sâbite olan Mahmud Çelebi b. Abdi meclis-i şer‘-i hatîrde müvekkile-i mezbûrenin zevci Süleyman Bey b. Hüseyin mahzarında bi’l-vekâle ikrâr ve takrîr-i kelâm edip müvekkile-i mezbûre Âişe merkūm Süleyman Bey’in zevce-i gayr-ı medhûlün-bihâsı olmağla merkūmun zimmetinde olan beş bin akçe nısf mehr-i mü’ecceli ve zevci mezbûra teslîm eylediğim bin beş yüz akçe üzerine bi’l-vekâle mezbûr Süleyman Bey ile muhâla‘a-i sahîha-i şer‘iye [ile] muhâla‘a eylediğimde ol dahi hul‘-ı mezbûru kabûl eylediğinden sonra zevciyete müte‘allika de‘âvîden bi’l-vekâle mezbûrun zimmetini ibrâ ve ıskāt ve mezbûr Süleyman Bey dahi müvekkilem mezbûre Âişe’nin zimmetini kezâlik zevciyete müte‘allika de‘âvîden ibrâ eyledim dedikde mukırr-ı mezbûru bi’l-vekâle cârî ve sâdır olan ikrâr-ı muharrerinde mezbûr Süleyman Bey bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis min-Muharremi’l-harâm li-sene selâse ve seb‘în ve elf. Şuhûdü’l-hâl: Ali Ağa b. Ahmed, Mustafa Çelebi b. Abdullah, Mehmed Çelebi b. Mahmud, Mustafa Çelebi b. Abdi, Şükrullah b. Mustafa.