İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 882 Hüküm no: 1085 Orijinal metin no: [151b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Receb’in menzilini Osman b. Abdullah’a satıp tarlasınının da kullanım hakkını devrettiği Havâss-ı Refî‘a muzâfâtından Boyalıklar [Boyalık] nâm karyede sâkin Ahmed b. Receb meclis-i şer‘de bâ‘isü’l-kitâb Osman b. Abdullah mahzarında ikrâr ve i‘tirâf [edip] karye-i mezbûrede vâki‘ bir tarafı Adile mülküne ve bir tarafı İmâm Ahmed Çelebi tasarrufunda olan vakıf menzile ve bir tarafı Mustafa Beşe menziline ve bir tarafı ba‘zan Hasan nâm kimesne mülküne ve ba‘zan tarîk-i âmma müntehî bir bâb çatma oda ve havluyu müştemil mülk menzilimi mezbûr Osman’a üç bin beş yüz akçeye mukaddemâ bey‘ ve teslîm edip ol dahi vech-i muharrer üzere iştirâ ve tesellüm ve kabûl eyledikden sonra yine karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd Savar tarlası demekle ma‘rûf bir kıt‘a tarlayı dahi iki bin akçeye ma‘rifet-i sahib-i arz ile mezbûr Osman’a ferâğ ve tefvîz ol dahi tefevvüz ve kabûl eyledikden sonra semen-i mezbûr üç binbeş yüz akçe ve bedel-i mezkûr iki bin akçe ki cem‘an beş bin beş yüz akçeyi mezbûr Osman yedinden tamamen ahz u kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis min-Muharremi’l-harâm li-sene selâse ve seb‘în ve elf. Şuhûdü’l-hâl: Ali Beşe b. Sefer, Mustafa Beşe b. Ramazan, Ali b. Mehmed, Mehmed b. Mehmed, Mustafa Beşe b. ( ), Ahmed b. Mustafa.