İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 883 Hüküm no: 1086 Orijinal metin no: [151b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Raziye bt. Hacı Nasuh’un mehir hususunda ayrıldığı kocası Piyale Bey b. Abdullah’ın zimmetini ibra ettiği Mahmiye-i İstanbul’da Monla Gürânî mahallesi sâkinelerinden işbu râfi‘atü’l-kitâb Râziye bt. el-Hâc Nasuh nâm hatun meclis-i şer‘-i hatîr-i lâzımü’t-tevkīrde Piyale Bey b. Abdullah nâm kimesne mahzarında ikrâr ve takrîr-i kelâm ve ta‘bîr ani’l-merâm edip zevcim olup gāib olan Mustafa’nın fevtini bana haber verdiklerinde ben dahi nefsimi mezbûr Piyale Bey’e tezvîc etmiş idim ba‘dehû hayyen gelmekle hâkimü’ş-şer‘ tefrîk edip mehrim olan bin akçeyi taleb eylediğimde edâsına hükm-i şer‘î lâhık olmağın hâlâ mezbûr Piyale yedinden bin akçe mehrim mukābelesinde bir sincâbî atlas kaftan ile turuncî şal alıp kabz edip zevciyete ve gayra müte‘allika âmme-i de‘âvî ve mütâlebât ve eymân [ve] muhâsamâtdan zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledim dedikde gıbbe’t-tasdîkı’ş-şer‘î mezbûr Piyale Bey dahi meclis-i merkūmda mezbûre Râziye mahzarında ikrâr ve takrîr-i kelâm edip ben dahi mezbûre Râziye’nin zimmetini zevciyete ve gayra müte‘allika cemî‘ de‘âvîden ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Muharremi’l-harâm li-sene selâse ve seb‘în ve elf. Şuhûdü’l-hâl: Ahmed Efendi b. Halil imâm-ı Saray-ı atîk, Abdullah Çelebi b. Himmet el-imâm, İlyas Halîfe b. Arzuman, Ali Bey b. İbrahim el-bevvâbü’s-sultanî, Abdi Çelebi b. Hüseyin, Rasûl b. Rıdvan, Mehmed b. Ramazan.