İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 883 Hüküm no: 1087 Orijinal metin no: [151b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Delirmiş olan Ali Ağa b. Bali’nin tasarrufunda olup üç seneden beri kira bedeli ödenmeyen vakıf arsanın yerinde keşfolunduğu Mahmiye-i İstanbul’da Baklalı mahallesinde vâki‘ Kemâl Bey mescid-i şerîfinde mü’ezzin ve zikri âtî muhterik menzil arsasına hasbî mütevellî olan işbu bâ‘isü’l-kitâb Receb Eendi b. Sefer mahfil-i kazâda yine mahalle-i mezbûre sükkânından olup cünûn-ı mutbık ile mecnûn olan Ali Ağa b. Bali’nin kıbel-i şer‘den mansûb vasîsi olan Mustafa Çelebi b. Mahmud mahzarında üzerine da‘vâ ve takrîr-i kelâm edip mahalle-i mezbûrede vâki‘ merhûme Zahide bt. Abdullah nâm hatun gallesini mahalle-i mezbûre mescid-i şerîfinde mü’ezzin olanlara şart eylediği iki tarafı merhûm Ali Ağa mülkü ve bir tarafı Sitti Hatun vakfı ve bir tarafı [tarîk-i] âm ile mahdûd olup senede üç yüz altmış akçe mukāta‘alı olan arsa-i mezbûre Ali Ağa’nın üzerinde olup lâkin üç seneden beri mukāta‘ası taraf-ı vakfa edâ olunmayıp mezbûr Ali Ağa zimmetinde bâkī olmağla arsa-i merkūmenin üç senede müctemi‘ bin seksen akçeyi hâlâ tevliyetim hasebiyle vasîyy-i mezbûrdan taleb ederin suâl olunsun dedikde gıbbe’s-suâl vasîyy-i mezbûr cevâbında fi’l-vâki‘ vasîsi olduğum mezbûr Ali Ağa’nın zikrolunan arsa mukāta‘asından zimmetinde üç senede müctemi‘ bin seksen akçe elân taraf-ı vakf-ı mezbûra deynidir lâkin vâkıfe-i mezbûrenin vakf eylediği arsa-i merkūme Ali Ağa’nın mülkü ile mahlût olmağla kıbel-i şer‘den üzerine varılıp ahâlî-i mezbûreden arsa-i merkūmenin ve mukāta‘asının mikdârı suâl olunup haberleri tahrîr olunmak matlûbumdur dedikde savb-ı şer‘den Mevlânâ Keşfî Mustafa Efendi irsâl olunup ol dahi zeyl-i rakīmde muharrerü’l-esâmî olan Müslimîn ile zikrolunan arsa-i mahdûde-i mezkûrenin üzerine varıp mütevellî-i merkūm muvâcehesinde vâkıfe-i mezbûrenin arsası ve mukāta‘asının mikdârları ahâlî-i mahalle-i mezbûrede el-Hâc Mustafa b. Hızır ve Abdurrahman Çelebi b. Mehmed ve Vezneci Mehmed Çelebi b. Murtaza ve Seydi Odabaşı b. Hızır ve Kurd Baba b. Abdullah nâm kimesnelerden suâl olundukda onlar dahi fi’l-vâki‘ tarîk-i âm cânibinde be-hesâb-ı şatrancî otuz beş zirâ‘ arsa vâkıfe-i mezbûre Zahide Hatun vakfı olan arsa ve senede üç yüz altmış akçe mukāta‘ası dahi vardır deyü her biri alâ-tarîkı’ş-şehâde haber verdiklerini mevlânâ-yı mezbûr mahâllinde tahrîr ba‘dehû irsâl olunan Halil ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin ve’l-işrîn min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed Efendi b. Musa el-imâm, Osman Halîfe b. Halil, Mahmud Çelebi b. Hüseyin, Abdullah Çelebi b. Hüseyin, Mustafa Çelebi b. Hüseyin.