İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 889 Hüküm no: 1095 Orijinal metin no: [152b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Yenişehir Kadısı Enes Efendi’nin merhum Hüseyin Efendi’de olan alacağının terekesinden tahsil olunduğu Husûs-ı âti’l-beyânın mahâllinde istimâ‘ ve tahrîri iltimâs olunmağın savb-ı şer‘den Mevlânâ Mustafa Efendi b. Ahmed irsâl olunup ol dahi mahmiye-i İstanbul’da Debbağzâde mahallesinde vâki‘ merhûm Hüseyin Efendi b. Mehmed Beşe’nin menziline varıp zeyl-i rakīmde esâmîleri mastûr Müslimîn huzûrunda akd-i meclis-i şer‘-i kavîm eyledikde sâbıkā Yenişehir kādısı iken vefât eden Enes Efendi b. Mehmed Efendi’nin sagīre kızı Afife’nin vasîyy-i şer‘îsi olan Ebûbekir Efendi b. Mehmed meclis-i ma‘kūd-ı mezbûrda müteveffâ-yı mezkûrun babası ve sagīre kızı Fâtıma’nın vasîyy-i şer‘îsi olmağla muhallefâtına vâzı‘u’l-yed etdiği sâbit olan mezbûr Mehmed Beşe mahzarında üzerine da‘vâ edip vasîsi olduğum mezbûre Afife’nin mâlından olmak üzere müteveffâ-yı mezbûr Hüseyin Efendi’ye hâl-i hayatında on bin akçe vermiş idim kable’l-edâ Hüseyin Efendi vefât edip terekesine vasîyy-i mezbûr Mehmed Beşe vâzı‘u’l-yed olmağın suâl olunup tereke-i vâfiyesinden alıverilmek taleb ederim dedikde gıbbe’s-suâl ve’l-inkâr ve akībe’l-istişhâd udûl-i ricâl-i Müslimînden olup müteveffâ-yı mezbûrede Harrât Âli mahallesinde sâkin Ahmed Beşe b. Abdullah ve Ali Efendi b. Şaban nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ vasîyy-i mezbûr Ebûbekir Efendi müteveffâ-yı mezbûr Hüseyin Efendi’ye vasîsi olduğu sagīre-i mezbûre Afife’nin mâlından olmak üzere on bin akçe def‘ ü teslîm eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle oldukdan sonra meblağ-ı mezbûru küllen veyâ ba‘zan ahz u istifâ veyâ turûk-ı şer‘iyeden bir tarîk ile müteveffâ-yı mezbûrun zimmetini ibrâ ve ıskāt etmediğine kendi fi‘ili olmağla vasîyy-i mezbûr Ebûbekir Efendi’ye yemîn teklîf olundukda ol dahi alâ-mâ hüve’l-mesûl halfü billâhi’l-aliyyü’l-azîm etmeğin mûcebince ba‘de’l-hükm vasîyy-i mezbûr Ebûbekir Efendi meclis-i mezbûrda yine vasîyy-i merkūm Mehmed Beşe muvâcehesinde ikrâr edip edâsına hükm-i şer‘î lâhık olan on bin akçeyi vasîyy-i mezbûr yedinden bi’l-vesâye tamamen alıp kabz eyledim dediğin mevlânâ-yı mezbûr mahâllinde istimâ‘ ve hükmedip ba‘dehû ma‘an irsâl olunan Sarrâc Ali Beşe b. Mustafa ile meclis-i şer‘a gelip inhâ ve takrîr etmeğin mevlânâ-yı mezbûrun hükmü tenfîz olunup mâ-vaka‘a bi’t-taleb ketb olundu. Fi’l-yevmi’s-sâlis min-Muharremi’l-harâm li-sene selâse ve seb‘în ve elf. Şuhûdü’l-hâl: es-Sâbıkūn