İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 895 Hüküm no: 1102 Orijinal metin no: [153b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani Hatun’un kocası merhum Hüseyin Efendi’de olan tüm alacağını terekesinden tahsil edip diğer varislerin zimmetini ibra ettiği Husûs-ı âti’l-beyânın mahâllinde istimâ‘ ve tahrîri iltimâs olunmağın savb-ı şer‘den Mevlânâ Mustafa Efendi b. Ahmed irsâl olunup ol dahi mahmiye-i İstanbul’da Debbağzâde mahallesinde vâki‘ merhûm Hüseyin Efendi b. Mehmed’in menziline varıp zeyl-i rakīmde esâmîleri mastûr Müslimîn huzûrunda akd-i meclis-i şer‘-i kavîm eyledikde müteveffâ-yı mezbûrun zevcesi olup Yenibağçe kurbünde Karabaş mahallesinde sâkine Ümmühani Hatun tarafından husûs-ı câ’i’z-zikre vekîl olup mezbûrenin zâtına ma‘rifet-i şer‘iye ârifân olan Mustafa Çelebi b. Mehmed ve Yusuf b. Abdullah şehâdetleri ile şer‘an vekâleti sâbite olan babası Mehmed Ağa b. Yusuf meclis-i ma‘kūd-ı mezbûrda müteveffâ-yı mezbûrun babası ve sagīre kızı Fâtıma’nın vasîyy-i şer‘îsi olmağla muhallefâtına vâzı‘u’l-yed olan mezbûr Mehmed mahzarında bi’l-vekâle ikrâr ve takrîr-i kelâm edip kızım müvekkilemin zevci müteveffâ-yı mezbûr zimmetinde olan altı yüz akçe hakkını ve dahi zimmetinde mütekarrir olan on sekiz bin akçe mehr-i mü’eccel-i müsbetini ve bin dokuz yüz kırk bir akçe sümün hissesini vekâlet-i mahkiyem hasebiyle vasîyy-i mezbûr Mehmed Beşe yedinden tamamen alıp kabz edip kızım müvekkilem mezbûre Ümmühani’nin tereke-i müteveffâ-yı mezbûrda hak ve alâkası kalmadı dedikde gıbbe’t-tasdîkı’ş-şer‘î mevlânâ-yı mezbûr vâki‘ hâli mahâllinde tahrîr ba‘dehû ma‘an irsâl olunan Sarrâc Ali Beşe b. Mustafa ile meclis-i şer‘a gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâlis mine’l-Muharremi’l-harâm li-sene selâse ve seb‘în ve elf. Şuhûdü’l-hâl: es-Sâbıkūn.