İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 895 Hüküm no: 1103 Orijinal metin no: [153b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Andriya Papas v. Abraham’ın ölen Sefer v. Şamek’den elli sekiz bin akçe alacağı olduğuna dair yemin ettiği İşbu kitâbın sahibi olan Andriya Papas v. Abraham nâm Ermeni meclis-i şer‘de medîne-i Eyyûb’de Kapı Ağası fırınında habbâz iken hâlik olan Sefer v. Şamek nâm Ermeni’nin evlâd-ı sıgārına vasîyy-i şer‘î olup terekesine vâzı‘u’l-yed olan Asar v. Hozik nâm zimmî muvâcehesinde üzerine da‘vâ edip hâlik-i mezbûr zimmetinde altmış bin akçe hakkım olup hâl-i sıhhatinde iki bin akçesini alıp kabz edip bâkī zimmetinde elli sekiz bin akçe hakkım kaldığı sıhhatinde şuhûd mahzarında ikrâr dahi etmiş idi hâlâ meblağ-ı mezbûru kable’l-edâ hâlik olmağla terekesinden taleb ederim suâl olunsun dedikde gıbbe’s-suâl vasîyy-i mezbûr cevâbında hâlik-i mezbûrun terekesine vaz‘-ı yedini ikrâr mezbûrun hâlik-i merkūm zimmetinde ol mikdâr akçe hakkı olup kable’l-edâ hâlik olduğunu inkâr eyledikde müdde‘î-i mezbûrdan müdde‘âsı için beyyine taleb olundukda tâife-i Ermeniyân’dan Karabet v. Haçok ve Babik v. Arakil li-ecli’ş-şehâde meclis-i şer‘a hâzırân olup gıbbe’l-istişhâdi’ş-şer‘î fi’l-vâki‘ hâlik-i mezbûr hâl-i sıhhatinde müdde‘î-i mezbûra deyni olan altmış bin akçeden iki bin akçesini verdikde müdde‘î-i mezbûrun zimmetimde elli sekiz bin akçe hakkı kaldı deyü huzûrumuzda ikrâr eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyeti şerâ’iti’’l-kabûl şehâdetleri makbûle oldukdan sonra müdde‘î-i mezbûr Andriya Ermeni’ye yemîn teklîf olundukda ol dahi [bi]-hasebi’l-mesûl yemîn billâhillezî enzele’l-İncîle alâ-İsa aleyhisselâm etmeğin mûcebince ba‘de’l-hükm mâ hüve’l-vâki‘ bi’t-taleb ketb olundu. Fi’l-yevmi’s-sâdis mine’l-Muharremi’l-harâm li-sene selâse ve seb‘în ve elf. Şuhûdü’l-hâl: Hüseyin Efendi el-Burûsî, Ekmekciler Kethudâsı Mehmed Çelebi, el-Hâc Mehmed Beşe, el-Hâc Ahmed Çelebi b. Mahmud kethudâ-yı muhzırân, Abdi Çelebi b. Hüseyin, el-Hâc Şaban [b.] el-Hâc İsmail.