İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 896 Hüküm no: 1104 Orijinal metin no: [153b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Osman’ın vakfettiği menzil arsasına Hüseyin Ağa b. Abdülbaki’nin mütevelli tayin olunduğu Merhûm Osman nâm sahibü’l-hayr vakıf ve gallesi evlâdına ve evlâd-ı evlâdına ve ba‘de inkırâzi’l-evlâd Medîne-i Münevvere fukarâsına şart ve ta‘yîn eylediği mahmiye-i İstanbul’da Haydar Ağa mahallesinde vâki‘ bir tarafı sâbıkā Sekbânbaşı Ömer Ağa Vakfı’na ve bir tarafı Sekbânbaşı Hasan Ağa mülküne ve bir tarafı tarîk-i hâssa ve bir tarafı tarîk-i âmma müntehî muhterik menzil arsasının mütevellîsi olmayıp bir mütevellî nasbı lâzım ve mühim olmağın işbu bâ‘isü’r-rakīm Hüseyin Ağa b. Abdülbaki dîndâr ve müstakīm ve her vechile tevliyet uhdesinden gelmeğe kādir olmağın arsa-i mezbûreye kıbel-i şer‘den merkūm Hüseyin Ağa mütevellî nasb ü ta‘yîn olundukda ol dahi kabûl ve hizmet-i lâzımesin edâya ta‘ahhüd etmeğin mâ-vaka‘a bi’t-taleb ketb olundu. Fi’l-yevmi’t-tâsi‘ mine’l-Muharremi’l-harâm li-sene selâse ve seb‘în ve elf. Şuhûdü’l-hâl: Umdetü’l-müderrisîni’l-kirâm zübdetü’l-muhakkıkīni’l-fihâm Mahmud Efendi, Umdetü erbâbü’t-tahrîr ve’l-kalem zübdetü ashâbi’t-tastîr ve’l-kalem Rüstem Efendi b. Mehmed, Mustafa Ağa b. Mehmed, el-Hâc Mustafa b. Hasan, el-Hâc Mustafa Beşe b. Musa.