İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 903 Hüküm no: 1117 Orijinal metin no: [155b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. ( ) kazasının 3.038,5 adet avarız hanesinin karşılığında her bir haneden 429’ar akçe kürekçi bedeli tahsiline dair ferman Akzâ kuzâtü’l-Müslimîn evlâ vülâti’l-muvahhidîn ma‘denü’l-fazl ve’l-yakīn vârisü ulûmü’l-enbiyâ ve’l-mürselîn hüccetü’l-hakkı ale’l-halkı ecma‘în el-muhtassu bi-mezîd-i inayeti’l-meliki’l-mu‘în Mevlânâ İstanbul Kādısı ( ) -zîdet fezâ’iluhû- tevkī‘-i refî‘-i hümâyûn vâsıl olucak ma‘lûm ola ki kazâ-i mezbûrda vâki‘ üç bin otuz sekiz buçuk avârız hânelerinin bin yetmiş iki senesine mahsûb olmak üzere avârızları mukābelesinde kürekçi bedelleri tahsîli fermânım olmağla Hazîne-i âmiremden verilen mühürlü ve nişânlı mevkūfât defteri sûreti mûcebince ol mikdâr avârız hânelerinin her bir hânesinden dörder yüz yirmi dokuzar akçe kürekçi bedellerin ve Tersâne-i âmirem mühimmâtı için vakt ü zamanı ile cem‘ ve tahsîl etdirilmek fermânım olmuşdur buyurdum ki hükm-i şerîfimle ( ) vardıkda bu bâbda sâdır olan emrim üzere amel edip dahi kazâ-i mezbûrda vâki‘ ol mikdâr avârız hânelerinin târih-i mezbûra mahsûb olmak üzere her bir hânesinden vech-i meşrûh üzere tahsîli fermânım olan dörder yüz yirmi dokuzar akçe kürekçi bedeli akçelerin irsâl olunan mühürlü ve nişânlı mevkūfât defteri sûreti mûcebince Tersâne-i âmirem mühimmâtı için tahsîl ve Hazîne-i âmirem defterlerinde îrâd ve masraf olunup mevkūfât defterlerine kaydetdiresin ve bundan mâ‘adâ Tersâne-i âmirem harcı için her bir hâneden on beşer ve cem‘ eden mübâşirim cihet-i ma‘îşeti için onar akçe aldırıp bundan ziyâde bir akçe alınmaya ve aldırmayasın kesr-i defterden ve noksan-ı hâneden ve hilâf-ı emr u defter te‘addî ve tecâvüzden gāyet ihtirâz eyleyesin şöyle bilesin alâmet-i şerîfe i‘timâd kılasın. Tahrîren fi’l-yevmi’s-sâlis ve’l-işrîn min-Şabani’l-mu‘azzam li-sene isneteyn ve seb‘în ve elf. Be-makām-ı Kostantıniyyeti’l-mahmiye