İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 904 Hüküm no: 1118 Orijinal metin no: [155b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Kethuda Mescidi Vakfı’na ait olup yanan boyahaneye mîrîye ait zannıyla hiç kimsenin müdahalesine izin verilmemesine dair ferman Akzâ kuzâtü’l-Müslimîn evlâ vülâti’l-muvahhidîn ma‘denü’l-fazl ve’l-yakīn hüccetü’l-hakkı ale’l-halkı ecma‘în vârisü ulûmü’l-enbiyâ ve’l-mürselîn el-muhtassu bi-mezîd-i inayeti’l-meliki’l-mu‘în Mevlânâ İstanbul Kādısı ( ) -zîdet fezâ’iluhû- tevkī‘-i refî‘-i hümâyûn vâsıl olucak ma‘lûm ola ki hâlâ Dîvân-ı Hümâyûnumda mevkūfâtcı olan kıdvetü’l-emâcid ve’l-a‘yân Magnisalızâde Ahmed -zîde mecduhû- Dîvân-ı Hümâyûnuma arzuhâl edip sâbıkā Dergâh-ı mu‘allâm yeniçerileri kethudâsı olan İbrahim Kethudâ Mescidi vakfı olup mahmiye-i İstanbul’da Acemoğlanı Meydânı başında bir tarafı Acemoğlanı odaları civarına ve iki tarafı tarîk-i âmma müntehî olan bir boyahânesini bin yetmiş senesi Zilka‘de’sinde vâki‘ olan ihrâkdan sonra bundan akdem başçavuş olan Mehmed zikrolunan boyahânenin sahibi olmayıp arz-ı mîrî olmak zu‘muyla taraf-ı mîrîden alıp zabteylemek murâd eyledikde üzerine da‘vâ olunup icâre-i mu‘accele ve mü’eccele ile mûmâ-ileyhin tasarrufunda olduğu isbât ve yedine kıbel-i şer‘den bin yetmiş iki Rebî‘ülûlâ’sının on dokuzu günü târihiyle müverrah hüccet-i şer‘iye verildiğini bildirip mûcebince zabt u tasarruf etdirilip taraf-ı mîrîden ve âhardan kimesne dahl ü ta‘arruz etdirilmemek bâbında emr-i şerîfim verilmek recâ eylemeğin hüccet-i şer‘iye mûcebince amel olunmak fermânım olmuşdu. Buyurdum ki hükm-i şerîf vardıkda bu bâbda sâdır olan emrim üzere amel edip dahi zikrolunan boyahâne arsasını mûmâ-ileyhin elinde olan hüccet mûcebince Acemoğlanı Meydânı içinde olan mescid-i şerîfin vakfından olmağla mûmâ-ileyh ma‘rifet-i şer‘le zabt u tasarruf edip bundan akdem arz-ı mîrî zu‘muyla müdâhale eden mezkûr Mehmed Çavuş’u ve taraf-ı mîrîden ve âhardan kimesne[y]i bir vechile dahl ü ta‘arruz etdirmeyesiz şöyle bilesiz alâmet-i şerîfe i‘timâd kılasız. Tahrîren fî-gurreti şehri Zilka‘deti’ş-şerîfe li-sene isneteyn ve seb‘în ve elf. Be-makām-ı Kostantıniyyeti’l-mahrûse