İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 111 Hüküm no: 18 Orijinal metin no: [2a-7] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmü’l-veled olan Mülâyim bt. Abdullah’ın artık hür olduğu İsbât-ı ümm-i velediyyet Mahmiye-i İstanbul’da Edirnekapısı kurbunda sâkin olup mukaddemâ vefât eden Mehmed b. Abdullah’ın sulbî sagīr oğlu Mehmed’in vâlidesi ve ümm-i veledi bâ‘isetü’l-vesîka Mülâyim bt. Abdullah meclis-i şer‘de kendiye ve sagīre-i mezbûra refîk olmak zu‘muyla vâzı‘u’l-yed olan Selim Beşe b. ( ) mahzarında üzerine da‘vâ edip ben mukaddemâ fevt olan Hasan’ın memlûke câriyesi olup ba‘de vefâtihî evlâd-ı sıgārına intikāl eylediğimde tereke-i menkūlesi bey‘ olundukda mezbûr Mehmed beni sekiz bin akçeye re’y-i hâkimi’ş-şer‘ ile iştirâ edip ba‘dehû hâkimü’ş-şer‘ mezbûr Mehmed’i sıgār-ı merkūmuna vasî nasb eyledikden sonra mezbûr Mehmed bana vat‘ edip işbu sagīr-i mezbûr hâsıl oldukda, da‘vet-i sagīr-i mezbûr mezbûr Mehmed’in sulbî oğlu ve ben ümm-i veledi olmağla fevtinden sonra ben âzâd olup hürre olmuş iken [2b] sıgār-ı merkūmuna vasî olan mumcu Ali Beşe mücerred mezbûr Mehmed’in re’y-i hâkimü’ş-şer‘ ile beni sekiz bin akçeye şirâsı câiz değildir hâlâ sen ve sagīr-i mezbûr Mehmed sıgār-ı merkūmunun mülküsün deyû bi gayr-ı vech-i şer‘î mezbûr Selim Beşe’ye beni ve sagīr-i mezbûr Mehmed’i bey‘ ve teslîm eyledi hâlâ mezbûr Selim Beşe’den suâl olunup ben ve sagīr-i mezbûrdan kasr-ı yedine tenbîh olunmak matlûbumdur dedikde gıbbe’s-suâl merkūm Selim Beşe cevâbında fi’l-vâki‘ kaziyye minvâl-i muharrer üzredir deyû mezbûrânın hürriyetini ikrâr etmeğin ikrârı mûcebince mezbûr Selim Beşe’ye merkūmândan kasr-ı yedine tenbîh olunup mâ vaka‘a bi’t-taleb ketb olundu. Fi’l-yevmi’l-âşir min şehri Ramazâni’l-mübârek li sene selâse ve seb‘în ve elf. Şuhûdü’l-hâl: El-Hâc Ahmed b. Mahmud, Ahmed b. ( ) ed-Dâ‘î, Şükrullah [b.] Mustafa, Abdi [b.] Hüseyin, Mustafa b. İsâ.