İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 112 Hüküm no: 19 Orijinal metin no: [2b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülkerim Ağa vakfının Hasan Efendi b. Ebubekir zimmetindeki alacağının tahsil edildiği Kabz-ı asl-ı mâl-ı vakf ve ribh Merhûm Kızlarağası Abdülkerim Ağa vakfına bi’l-fi‘l mütevellî olan el-Hâc Halil b. Hanefî meclis-i şer‘de Sofya kazâsından münfasıl mefharü’l-mevâliyyü’l-kirâm Hasan Efendi b. Süleyman tarafından tasdîk-i âti’l-beyâna sâbitü’l-vekâle vekîl olan Abdülkerim Efendi b. Ebûbekir muvâcehesinde bi’t-tevliyye ikrâr ve i‘tirâf edip müşârün-ileyh Hasan Efendi’ye altmışyedi Saferi gurresinde ikrâz ve teslîm ettiğim asl-ı mâl-ı vakf-ı mezbûrdan yüz elli üç bin akçe ve gurre-i mezbûreden târih-i kitâba gelince murâbaha-i şer‘iyyeden yüz on dört bin yedi yüz elli akçe ki cem‘an asl-ı mâl ve ribh iki yüz altmış yedi bin yedi yüz elli akçeyi mûmâ-ileyh Hasan Efendi yedinden tamâmen vakf için bi’t-tevliyye alıp kabz eyledim min ba‘d asl-ı mâl-ı vakf ve târih-i kitâba gelince ribhinden merkūm Hasan Efendi zimmetinde bir akçe ve bir habbe hak ve alâkam kalmadı dedikde mütevellî-i mezbûru cemî‘ kelimâtında vekîl-i merkūm vicâhen tasdîk etmeğin mâ vaka‘a bi’t-taleb ketb olundu. Fi’l-yevmi’r-râbi‘ aşer min şehri Ramazâni’l-mübârek sene 1073. Şuhûdü’l-hâl: Hasan Çavuş el-Mübâşir, Mahmud Efendi b. Abdullah, Abdurrahman Çelebi b. el-Hâc Ahmed, Mehmed Efendi b. el-Hâc Abdüsselam, Osman Çelebi b. Ali, Abdurrahman b. Abdullah, Yusuf Çelebi b. Abdullah.