.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 115
Hüküm no: 25
Orijinal metin no: [2b-7]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Eğin’in Kemerkab karyesinden Bahadır v. Avmit’in mülk bağını Devlet isimli Ermeni’nin çocukları Sahak ve Koğas kardeşlere sattığı

Mülknâme-i bağ Vilâyet-i Anadolu’da Eğin kazâsı müzâfâtından Kemerkâb nâm karye ahâlîsinden Bahâdır v. Avmit? nâm Ermeni meclis-i şer‘-i hatîr-i lâzımü’t-tevkīrde bâ‘isiyyü’l-vesîka Sahak ve Koğas veledey Devlet nâm Ermeniler muvâcehesinde ikrâr ve i‘tirâf edip karye-i merkūme toprağında vâki‘ bir tarafı Mardiros Ermeni bağına ve bir tarafı Ovanes nâm Ermeni bağına ve bir tarafı Kazar nâm Ermeni bağına ve bir tarafı tarîk-i âma müntehî mülk bağımı, ber vech-i iştirâk-i seviy mezbûrâna yüz otuz beş esedî guruşa bey‘ anlar dahi ber minvâl-i muharrer iştirâ ve kabûl eylediklerinden sonra, semeni olan yüz otuz beş esedî guruşu yedlerinden alıp kabz edip mahallinde tesellüm ve kabzına mezbûrânı taslît eyledim dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’s-sâlis aşer min şehri Ramazân sene 1073.


Şuhûdü’l-hâl: Osman Çelebi b. Ali, Sefer Bey b. Bayram, Mustafa b. İsâ, kasap Mustafa, Mehmed b. Ramazan, Yamak? v. Serkis, Mardiros v. Canyik, Marko v. Ohan, Murad v. Matkuş?.