.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 116
Hüküm no: 26
Orijinal metin no: [3a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hasan Ağa b. Abdullah’ın Hemmad bt. Agop’tan gasp ettiği eşyalar için sulh olduğu

Sulh-ı gümüş arayıcı Mahmiye-i İstanbul’da Mustafa Paşa mahallesinde sâkine Tekmar? bt. Agop nâm Ermeniyye meclis-i şer‘-i hatîrde mahmiye-i mezbûrede sâbıkan gümüş arayıcı olan Hasan Ağa b. Abdullah mahzarında ikrâr ve takrîr-i kelâm edip mezbûr Hasan Ağa mukaddemâ zevcim gāib ani’l-meclis Murad için akçe kırkar deyû sâkine olduğum menzili bastıkda, yedimde emânet olup fuzûlî ahz eylediğim yüz on kıt‘a esedî guruşu hâlâ merkūm Hasan Ağa yedinden tamâmen alıp kabz eylediğimden sonra, silk-i mülkümde olan eşyâmdan dahi üç yüz akçe kıymetli bir sîm kılıflı bıçak ve üç yüz akçe kıymetli bir altın hâtem ve elli akçe kıymetli bir gümüş saç bağı ve otuz akçe kıymetli dört münakkaş makrama ve her vakıyyesi yüzer akçe kıymetli yirmi dört vakıyye penbe ipliği ve yüz akçe kıymetli on iki kırmızı sahtiyân ve iki bin hurda akçemi gasb eylemiş idi deyû eşyâ-i mezbûrenin aynıları mevcûd ise aynıların müstehlek ise meblağ-ı merkūmun mislini ve mâ‘adâsının yevm-i ahzda olan kıymet-i merkūmelerin mezbûr Hasan Ağa’dan mukaddemâ da‘vâ ve taleb eylediğimde ol dahi inkâr etmeğin beynimizde münâza‘ât-ı kesîre vukū‘undan sonra vesâtat-ı muslihîn ile da‘vâ-yı meşrûhamdan mezbûr Hasan Ağa benimle an inkâr bin iki yüz nakid akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûru yedinden tamâmen alıp kabz eyledim min ba‘d husûs-ı mezbûra müte‘allika da‘vâdan mezbûr Hasan Ağa’nın zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ aşer min şehri Ramazâni’l-mübârek li sene selâse ve seb‘în ve elf.


Şuhûdü’l-hâl: Mustafa Efendi b. Hamîd el-İmâm, İbrahim Hoca el-Müezzin, el-Hâc Mehmed b. Abdullah el-Müezzin, Mustafa Odabaşı er-Râcil, Derviş Çelebi b. Mehmed, Şaban Çavuş b. Mustafa el-Mübâşir, Süleyman Bey bevvâb-ı sultânî, Mehmed b. Hızır, Süleyman b. Ali, Mustafa Çavuş b. Mehmed, Mehmed b. Abdullah.