.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 116
Hüküm no: 27
Orijinal metin no: [3a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ömer Ağa b. Hamza’nın Beşiktaş’taki menzil ve bahçesiyle üç adet tarlasının Ayşe bt. el-Hâc Mehmed’e satıldığı

Mülknâme-i bahçe Mahmiye-i İstanbul’da Harâccı Muhyiddin mahallesinde sâkin Ömer Ağa b. Hamza tarafından zikri âtî husûsa vekîl olup Hüseyin Bey b. Abdullah ve Hasan Beşe b. Kasım şehâdetleriyle şer‘an vekâleti sâbite olan Veyis Çelebi b. Abdullah meclis-i şer‘de mahrûse-i Galata’da Ekmekyemez mahallesi sükkânından Ayşe bt. el-Hâc Mehmed tarafından tasdîk-ı âti’l-beyâna vekîl olup bimâ hüve nehcü’s-sübût şer‘an vekâleti sâbite olan zevci Yahya b. el-Hâc Ahmed muvâcehesinde bi’l-vekâle ikrâr ve i‘tirâf edip mahrûse-i mezbûre a‘mâlinden Beşiktaş’da Ali Ağa mahallesinde vâki‘ bir tarafı vâdi ve bir tarafı Yamandioğlu demekle ma‘rûf zimmî ve bir tarafı el-Hâc Mehmed’in gül bahçesi ve bir tarafı tarîk-i âm ile mahdûd dört bâb fevkānî oda ve altında üç bâb tahtânî odaları ve ahırı ve bir yerde dahi beş fevkānî oda ve altında ahırı ve dolap kuyusu ve havuzı ve tahtapûşu müştemil menzil ve bahçesini mezbûre Ayşe Hâtun’a bey‘-i bâtt-ı sahîh-i şer‘î ile doksan yedi bin akçeye bey‘ ve teslîm edip ol dahi iştirâ ve tesellüm ve kabûl ettikden sonra, zikr olunan bahçeye karîb her birinin hudûdu beyne’l-ahâlî ma‘lûm üç kıt‘a tarlasının dahi tasarrufunu ma‘rifet-i sâhib-i arz ile mezbûre Ayşe’ye üç bin akçe bedel mukābelesinde ferâğ ve tefvîz edip ol dahi tefevvüz ve kabûl ettikden sonra bedel ve semen cem‘an yüz bin akçeyi mezbûre Ayşe yedinden tamâmen alıp kabz eyledi ba‘de’l-yevm zikr olunan menzil ve bahçe mezbûrenin mülkü ve tarlalar hakk-ı müfevvazıdır dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min şehri Ramazâni’l-mübârek sene 1073.


Şuhûdü’l-hâl: Ali Efendi b. Mahmud el-İmâm, el-Hâc Abdülkerim b. Süleyman, Abdurrahman Çelebi el-Müezzin, İbrahim Efendi el-İmâm, Abdurrahman Yazıcı b. Mehmed, Süleyman Çelebi b. İbrahim, Receb b. Abdullah, Gazanfer Halîfe b. Mehmed, Ömer Efendi b. ( ), Abdülbâkī Efendi b. ( ), Hasan Efendi b. ( ).