|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 130 Hüküm no: 48 Orijinal metin no: [4b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ali Sofu b. Ahmed’in İstarova’daki menzil, bostan yeri, bahçe ve bağlarını Hasan oğlu Mehmed ve Abdi kardeşlere sattığı
Mülknâme-i çiftlik Mahmiye-i İstanbul’da Üsküplü sûku kurbunda sâkin Ali Sofu b. Ahmed meclis-i şer‘-i hatîrde bâ‘isiyyü’l-kitâb Mehmed ve Abdi ibney Hasan muvâcehelerinde ikrâr ve i‘tirâf edip vilâyet-i Rumeli’nde İstarova kazâsına tâbi‘ Çeşme-i kebîr nâm karye sınırında vâki‘ çiftlik ta‘bîr olunur bir tarafı vâdi ve bir tarafı Bayram nâm kimesne menzili ve bir tarafı Kiko nâm zimmî mülkü ve bir tarafı tarîk-i âm ile mahdûd bir bâb tahtânî oda ve havluyu müştemil menzilimi ve menzil-i mezbûra muttasıl bir kıt‘a bostan yeri ve bahçeyi ve yine karye-i mezbûrede vâki‘ lede’l-ahâlî ma‘lûmü’l-hudûd birbirine karîb iki kıt‘a mülk bağımı, cemî‘ tevâbi‘i ile bi safkatin mezbûrân Mehmed ve Abdi’ye bey‘-i kat‘î ile üç bin akçeye bey‘ edip mezbûrlar dahi iştirâk-i seviy üzre iştirâ ve kabûl ettikden sonra, yine karye-i mezbûre sınırında vâki‘ olup her birinin hudûdu beyne’l-ahâlî ma‘lûm on kıt‘a tarlalarımın dahi hakk-ı tasarrufun ma‘rifet-i sâhib-i arz ile mezbûrân Mehmed ve Abdi’ye üç bin akçe bedel mukābelesinde ferâğ ve tefvîz edip anlar dahi ber vech-i iştirâk tefevvüz ve kabûl ettikden sonra, bedel ve semen cem‘an elli bin akçeyi mezbûrân Mehmed ve Abdi’nin yedlerinden alıp kabz edip zikr olunan emlâk ve arâziyi mahallinde zabta mezbûrânı taslît eyledim ba‘de’l-yevm emlâk-ı mezbûre ve cemî‘ arâzi-i mezkûre mezbûrların iştirâk üzre taht-ı yed ve tasarruflarındadır. Benim alâka ve medhalim yoktur dedikde mezbûr Ali Sofu’nun kelimât-ı meşrûhasını mezbûrân Mehmed ve Abdi vicâhen ve şifâhen tasdîk etmeğin mâ vaka‘a bi’t-taleb ketb olundu. Fi’l-yevmi’s-sâmin aşer min şehri Ramazâni’l-mübârek li sene selâse ve seb‘în ve elf.
Şuhûdü’l-hâl: Ali b. Mehmed, Hüseyin b. Ahmed, Hasan b. Ali, Ebûbekir b. Hasan, Mehmed b. Süleyman, Mustafa b. Ahmed.
|