|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 132 Hüküm no: 51 Orijinal metin no: [5a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
El-Hâc Musa b. Ali’nin müştemilatıyla birlikte menzilini Mustafa Çelebi’ye hibe ettiği
Hibe-i menzil Mahmiye-i İstanbul’da Mi‘mâr Ayas mahallesi ahâlîsinden el-Hâc Musa b. Ali meclis-i şer‘-i hatîr-i lâzımü’t-tevkīrde li ebeveyn karındaşı Ahmed Ağa’nın oğlu hâfızü’l-kitâb Mustafa Çelebi mahzarında ikrâr ve takrîr-i kelâm edip mahalle-i merkūmede vâki‘ bir tarafı Esirci el-Hâc Mehmed vakfına ve üç tarafı tarîk-i âma müntehî üç bâb tahtânî oda ve bir bâb şehnişînli fevkānî odayı ve bir su kuyusunu ve iki sofa ve bir matbahı ve mezbûr el-Hâc Mehmed duvarına muttasıl üç buçuk zirâ‘ muha[vva]tayı ve kenîfi müştemil mülk menzilimi tevâbi‘ ve levâhıkıyla mezbûr Mustafa Çelebi’ye hibe-i sahîha ile hibe ve teslîm ol dahi ber minvâl-i muharrer ittihâb ve tesellüm eyledi. Min ba‘d menzil-i mezbûr mezbûr Mustafa Çelebi’nin mülk-i mevhûbu olup keyfe mâ yeşâ’ mutasarrıf olsun dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâdis aşer min şehri Ramazâni’l-mübârek sene 1073.
Şuhûdü’l-hâl: Abdüllatif Efendi el-İmâm, Mustafa Çelebi b. Ahmed el-Müezzin, Hasan Çelebi b. el-Hâc Hürrem el-Müezzin, Mahmud Beşe b. İbrahim, Hasan Beşe b. Kasım, el-Hâc Ebûbekir b. Ömer, Hasan Bey b. Yusuf, Mustafa Çelebi b. Ali, Ahmed Çelebi b. Yusuf, Abdi Çelebi b. Hüseyin el-Muhzır, Mehmed b. Ramazan el-Muhzır.
|