|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 136 Hüküm no: 57 Orijinal metin no: [5b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Havva bt. Mehmed’in kocası Ali Beşe b. Mehmed’deki alacaklarını hibe ettiği
Hibe-i eşyâ Mahmiye-i İstanbul’da Karabaş mahallesi sâkinelerinden Havva bt. Mehmed nâm hâtun meclis-i şer‘-i hatîr-i lâzımü’t-tevkīrde zevci işbu râfi‘ü’l-kitâb Ali Beşe b. Mehmed mahzarında ikrâr ve takrîr-i kelâm edip zevcim mezbûr Ali’ye silk-i mülk-i sahîhimde münselik olan eşyâmdan bir kumaş yorgan ve bir kumaş yastık ve bir döşek ve bir kolan kuşak ve bir gümüş düğmeli mor kaftan ve bir alaca kaftan ve bir sîm önsuya? kuşak ve bir tencere ve bir sahan ve beynimizde miskāli ilm-i şer‘î ile ma‘lûm bilezik bahâsından zimmetinde olan beş bin beş yüz akçe hakkımı zevcim mezbûr Ali Beşe’ye hibe-i sahîha ile hibe ve temlîk ve teslîm edip ol dahi meclis-i hibede ittihâb ve kabûl ve kabz ve tesellüm eyledi ba‘de’l-yevm zikr olunan eşyâ ve meblağ-ı mezbûr beş bin beş yüz akçe zevcim mezbûr Ali’nin mülk-i mevhûbudur, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min şehri Ramazâni’l-mübârek sene 1073.
Şuhûdü’l-hâl: Şaban b. İnebey, Ali Beşe b. Osman Çukadar, Mustafa b. Ahmed, Abdi Beşe, Mehmed b. Ramazan, Şükrullah b. Mustafa, Abdi Çelebi b. Hüseyin, Mustafa b. İsâ.
|