|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 137 Hüküm no: 60 Orijinal metin no: [5b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ünzile bt. Süleyman’ın oğlu Receb b. Ali’nin Mustafa b. Hızır tarafından darb edilerek öldürüldüğü iddiasının asılsız olduğu
Yemîn Mahrûse-i Üsküdar’da Hamza Fakīh mahallesinde sâkin iken bundan akdem vefât eden Receb b. Ali’nin hasren vârisesi olan vâlidesi Ünzile bt. Süleyman nâm hâtun meclis-i şer‘-i şerîf-i lâzımü’t-teşrîfde, işbu râfi‘ü’l-kitâb Mustafa b. Hızır nâm kimesne mahzarında üzerine da‘vâ ve takrîr-i kelâm edip mezbûr Mustafa târih-i kitâbdan bir buçuk ay mukaddem kayıkda işler iken oğlum müteveffâ-yı mezbûr Receb’i bi gayri vech-i şer‘î yumruk ve depme ile darb edip onun darbıyla başı müteessiren fevt olmağla diyetini taleb ederim, suâl-i şer‘î olunsun dedikde gıbbe’s-suâl ve akībe’l-inkâr müdde‘iyye-i mezbûreden müdde‘âsını mübeyyine beyyine taleb olundukda ikāmet-i beyyineden izhâr-ı acz edip istihlâf etmeğin fi’l-vâki‘ müdde‘iyye-i mezbûrenin oğlu mezbûr Receb’i târih-i mezbûrda kayıkda işler iken yumruk ve depme ile darb edip onun darbından başı müteessiren fevt olmadığına, mezbûr Mustafa’ya yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince müdde‘iyye-i mezbûre Ünzile bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min şehri Ramazâni’l-mübârek li sene selâse ve seb‘în ve elf.
Şuhûdü’l-hâl: Mehmed Beşe b. Himmet, Ahmed Beşe b. Mehmed, İsmail Beşe b. Mehmed, İbrahim Beşe b. Ahmed, Mustafa b. Sefer el-Üsküdarî, Mehmed b. Davud, Mustafa b. Mehmed, Abdi Çelebi b. Hüseyin.
|