|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 138 Hüküm no: 61 Orijinal metin no: [5b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
İsmail b. Ali kendi hisselerini Sefer b. Veli’ye sattığı
Mülknâme Fi’l-asl vilâyet-i Anadolu’da Divriği kazâsına tâbi‘ Hanura nâm karye sâkinlerinden olup hâlâ mahmiye-i İstanbul’da Hasan Paşa mahallesinde sâkin İsmail b. Ali meclis-i şer‘de işbu bâ‘isü’l-kitâb Sefer b. Veli mahzarında ikrâr edip karye-i mezbûrede vâki‘ bir tarafı Hasan b. Dîvâne mülkü ve bir tarafı müşterî-i mezbûr mülkü ve bir tarafı Süleyman mülkü ve bir tarafı tarîk-i âm ile mahdûd dört bâb tahtânî oda ve havlu[yu] müştemil mülk menzil ile yine karye-i mezbûre kurbunda vâki‘ ma‘lûmü’l-hudûd mülk harman yeri, babam mezbûr Ali’nin mülkü olup ba‘de vefâtihî irsen nısfı bana ve nısf-ı âharı karındaşım Yusuf’a intikāl etmiş idi hâlâ bana intikāl eden nısf hisse-i şâyi‘amı merkūm Sefer’e tarafeynden îcâb ve kabûlü hâvî bey‘-i bâtt-ı sahîh ile beş riyâlî kebîr guruşa bey‘ edip ol dahi iştirâ ve kabûl eyledikden sonra yine karye-i mezbûrede vâki‘ ma‘lûmü’l-hudûd ve’l-kıt‘a tarlalar kezâlik babam müteveffâ-yı mezbûr Ali’den nısfı bana ve nısfı karındaşım mezbûr Yusuf’a intikāl etmiş idi hâlâ zikr olunan tarlalarda olan nısf hisse-i şâyi‘amı mezbûr Sefer’e sâhib-i arz ma‘rifetiyle beş riyâlî guruş bedel mukābelesinde ferâğ ve tefvîz, ol dahi tefevvüz ve kabûl eyledikden sonra semen-i mezbûr beş guruş ile bedel-i merkūm beş guruş ki cem‘an on guruş merkūm Sefer yedinden tamâmen alıp kabz edip zikr olunan menzil ve harman yerinde olan nısf hisse ile mârrü’z-zikr tarlalarda olan nısf hisseyi mahallinde zabt ve tasarrufa merkūm Sefer’i taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min şehri Ramazâni’l-mübârek sene 1073.
Şuhûdü’l-hâl: Mehmed b. Seydî, Hasan b. Mirza Ali, Abdünnebî b. Hüdâverdi, Baba Resûl b. Rıdvan.
|