|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 138 Hüküm no: 62 Orijinal metin no: [5b-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ümmühânî bt. Mehmed’in ev hissesini Yusuf Çelebi b. Ahmed’e sattığı
Mülknâme Mahmiye-i İstanbul’da Hasan Paşa mahallesi ahâlîsinden Ümmühânî bt. Mehmed nâm hâtun tarafından husûs-ı âti’z-zikre vekîl olup mezbûreyi ma‘rifet-i şer‘iyye ile ârifân müezzin Mehmed Çelebi b. ( ) ve Abdurrahman Çelebi b. Ömer şehâdetleri ile vekâleti sâbite olan Mustafa Çelebi b. Ahmed nâm kimesne meclis-i şer‘-i hatîr-i lâzımü’t-tevkīrde hâfızü’l-vesîka Yusuf Çelebi b. Ahmed mahzarında bi’l-vekâle ikrâr ve takrîr-i kelâm edip mahalle-i merkūmede vâki‘ bir tarafı Süleyman Beşe mülküne ve bir tarafı Ali Çelebi mülküne ve bir tarafı Receb Subaşı vakfına ve bir tarafı tarîk-i âma müntehî iki bâb fevkānî ve iki bâb tahtânî odalar ve kâriz ve kenîf ve müşterek su kuyusu ve cüneyneyi müştemil mülk menzilin rub‘ hisse-i şâyi‘ası müvekkile-i merkūmenin ve selâse-i erbâ‘ı mezbûr Yusuf Çelebi’nin mülkü olup ber vech-i iştirâk mutasarrıflar iken müvekkile-i merkūme zikr olunan hisse-i şâyi‘asını altı bin akçeye mezbûr Yusuf Çelebi’ye bâtten bey‘ ve teslîm ol dahi ber minvâl-i muharrer iştirâ ve tesellüm eyledikden sonra, semeni olan altı bin akçeyi mezbûr yedinden alıp kabz etmekle menzil-i mezbûrun cümlesi merkūm Yusuf Çelebi’nin mülkü olmuşdur keyfe mâ yeşâ’ mutasarrıf olsun dedikde gıbbe’t-tasdîk mâ vaka‘a bi’t-taleb ketb olundu. Fî 18 min şehri Ramazân sene 1073.
Şuhûdü’l-hâl: Hasan Ağa b. Hüseyin, Abdurrahman Çelebi b. Ömer, Mehmed Çelebi b. Ömer, el-Hâc Mustafa Odabaşı, Mehmed Çelebi b. Mustafa, Mehmed Efendi el-kadı, Süleyman Beşe er-Râcil, Yusuf Çelebi, Demirci Mustafa Çelebi, Abdi Çelebi el-Muhzır.
|