|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 140 Hüküm no: 64 Orijinal metin no: [6a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ali Ağa’nın vârislerinin Mahmud b. Arslan zimmetindeki alacaklarını kefili olan Halil Beşe b. İsmail’in kefâletten çıkarıldığı
Kefâletden ihrâc Mahmiye-i İstanbul’da Baba Hasan Alemî mahallesi ahâlîsinden olup mukaddemâ fevt olan Ali Ağa’nın verâseti zevce-i metrûkesi Şahbaz bt. Abdullah nâm hâtuna [ve] sulbî kebîr oğlu Osman Ağa ile sulbiye sagīre kızı İsmihan’a münhasıra olup mezbûr Osman Ağa’dan ve mezbûre Şahbaz Hâtun tarafından husûs-ı âti’z-zikre vekîl olup mezbûreyi ma‘rifet-i şer‘iyye ile ârifân olan İsmail Halîfe b. Abdülkādir ve Hüseyin b. Mehmed şehâdetleri ile vekâleti sâbite olan Yusuf Çelebi b. Abdülmennân vekâleten meclis-i şer‘de bâ‘isü’l-kitâb Halil Beşe b. İsmail mahzarında ikrâr ve takrîr-i kelâm edip mûrisimiz müteveffâ-yı merkūm Ali Ağa terekesinden gāib ani’l-meclis bevvâb-ı sultânî Mahmud b. Arslan nâm kimesne zimmetinde karz-ı şer‘îden olan yüz on bin akçenin yetmiş bin akçesine mezbûr Halil Beşe emr ve kabûlü hâvî kefâlet ile kefîl oldukdan sonra, meblağ-ı mezbûr ikimizin hissesine ta‘ayyün olmağla bi’l-kefâle otuz sekiz bin dokuz yüz otuz akçesini yedinden alıp otuz bin yetmiş akçesi bâkī kalmış idi el-hâletü hâzihî mezbûr Halil Beşe[’yi] dahi zikr olunan kefâletden ihrâc eyledik. Min ba‘d meblağ-ı mezbûru bi’l-kefâle mezbûr Halil Beşe’den da‘vâ edersek istimâ‘ olunmasın dediklerinde, gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min şehri Ramazân sene 1073.
Şuhûdü’l-hâl: Hasan Çelebi b. el-Hâc Mehmed, el-Hâc İsâ b. Hüseyin, Ali Beşe b. Mehmed, Aşçı Mustafa Beşe, Halil Çelebi b. Hızır, Mehmed Çelebi b. Yusuf, Mustafa Beşe b. Abdullah, Yusuf b. Abdullah.
|