|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 141 Hüküm no: 66 Orijinal metin no: [6a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed b. Abdullah’ın El-Hâc Hüseyin b. Mehmed’e olan borcunu ödemesi
Karzdan 50 esedî edâsına tenbîh Mahmiye-i Galata’da Okçu mahallesi sâkinlerinden işbu râfi‘ü’l-kitâb el-Hâc Hüseyin b. Mehmed nâm kimesne meclis-i şer‘-i şerîf-i lâzımü’t-teşrîfde, Mehmed b. Abdullah mahzarında üzerine da‘vâ ve takrîr-i kelâm edip mezbûr Mehmed zimmetinde cihet-i karzdan elli esedî guruş ile her biri yedişer dirhem olmak üzre on bir riyâlî guruş hakkım vardır, hâlâ taleb ederim suâl olunsun dedikde gıbbe’s-suâl mezbûr [el-Hâc Hüseyin b.] Mehmed cevâbında müdde‘î-i mezbûra zimmetimde ancak elli esedî guruş deynim vardır deyû ikrâr, ziyâde yedişer dirhem on bir riyâlî guruş deyni olduğunu inkâr etmeğin müdde‘î-i mezbûr el-Hâc Hüseyin’den müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin müdde‘î-i mezbûr el-Hâc Hüseyin’e ikrârı mertebesi olan meblağ-ı mezbûr elli guruşdan ziyâde yedişer dirhem on bir riyâlî guruş dahi deyni olmadığına mezbûr Mehmed’e yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin ikrârı mertebesi olan meblağ-ı mezbûr elli esedî guruşu mezbûr el-Hâc Hüseyin’e edâ ve teslîme tenbîh birle mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min şehri Ramazâni’l-mübârek li sene selâse ve seb‘în ve elf.
Şuhûdü’l-hâl: Mehmed b. Mustafa, Mustafa b. İsâ, Şükrullah b. Mustafa, Abdi Çelebi b. Hüseyin, Mehmed b. Ramazan.
|