|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 141 Hüküm no: 67 Orijinal metin no: [6a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hasan b. Kalem’in Mehmed b. Murad Efendi’ye olan borcunu vârislerine ödediği
Teslîmü’l-vasî mâle’s-sagīr Mahmiye-i İstanbul’da Debbâğzâde mahallesinde sâkin olup mukaddemâ vefât eden Mehmed b. Murad Efendi nâm sagīrin verâseti, li ebeveyn ammi oğulları Hasan ve Emirşah ibney Hamîd nâm kimesnelere münhasıra oldukdan sonra, mezbûrân Hasan ve Emirşah meclis-i şer‘de sagīr-i mezbûrun mansûben vasîsi olup terekesine bi’l-vesâye vâzı‘u’l-yed olan hâfızü’l-vesîka Hasan b. Kalem mahzarında her biri ikrâr edip mezbûr Hasan mukaddemâ defter-i kassâm[da] nâtık olduğu üzre, sagīr-i mezbûrun yirmi beş bin altı yüz akçe terekesini kabz eyledikden sonra hayât ve memâtında lâzım gelen mesârifine sarf edip on dört bin akçesi yedinde bâkī kalmış idi el-hâletü hâzihî meblağ-ı masrûfı tecvîz ve bâkī kalan on dört bin akçeyi dahi yedinden alıp hissemize isâbet eden yedişer bin akçeyi her birimiz kabz eyledik. Min ba‘d vasiyy-i mezbûr Hasan yedinde tereke-i müteveffâ-yı mezbûrdan bir şey bâkī kalmadı dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min şehri Ramazâni’l-mübârek sene 1073.
Şuhûdü’l-hâl: Şit b. Abdünnebî, Ahmed Efendi b. Ali Efendi, Mustafa Efendi b. Kasım Efendi, Mustafa Efendi b. el-Hâc Ahmed, Hasan b. Ramazan, Satılmış b. İsâ, Şükrullah Bey b. Mustafa, Ahmed b. İzzeddin, Mehmed Çelebi, Nuh b. Murad.
|