|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 150 Hüküm no: 83 Orijinal metin no: [7a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Havva bt. İbrahim’in boşandığı Mehmed Beşe b. İbrahim’den alacağı kalmadığı
Sulh Mahmiye-i İstanbul’da Nişancı Cafer Çelebi mahallesinde sâkine Havva bt. İbrahim meclis-i şer‘de zevc-i mutallıkı râfi‘ü’l-kitâb Mehmed Beşe b. İbrahim muvâcehesinde ikrâr ve i‘tirâf edip zevcim mezbûr Mehmed Beşe mukaddemâ beni tatlîk ettikde, iki bin akçe mehrimi ve nafaka-i iddetim için beş yüz akçe cem‘an iki bin beş yüz akçe hakkımı mezbûr Mehmed Beşe yedinden alıp kabz edip bir alaca sadef bir fistan ve bir üstlük ta‘bîr olunur dülbendim yedinde kalmış idi deyû da‘vâ edip beynimizde küllî nizâ‘ vâki‘ olmuş idi hâlâ da‘vâ-yı mezbûremden beni mezbûr Mehmed Beşe beş yüz akçe üzerine inşâ-i akd-i sulh ettikde, ben dahi sulh-ı mezbûru kabûl ve bedel-i sulh olan meblağ-ı mezbûru alıp kabz eyledim. Fîmâ ba‘d husûs-ı mezbûra müte‘allik zevcim mezbûr Mehmed Beşe ile da‘vâ ve nizâ‘ım yoktur. Mezbûr Mehmed Beşe’nin dahi benim yedimde bir yeni zümrüd küpesi var idi, ben dahi zikr olunan küpeyi merkūm Mehmed[’e] teslîm eyledim dedikde gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min [şehri] Ramazâni’l-mübârek li sene selâse ve seb‘în ve elf.
Şuhûdü’l-hâl: Ali Beşe Çukadar, Mustafa Beşe er-Râcil, Baba Resûl [b.] Rıdvan, Abdi Çelebi b. Hüseyin.
|