|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 154 Hüküm no: 89 Orijinal metin no: [7b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ümmühânî Hâtun bt. Mustafa’nın menzilini Mehmed Ağa b. Yusuf’a sattığı
Mülknâme Mahmiye-i İstanbul’da Yenibahçe kurbunda Karabaş mahallesinde sâkine Ümmühânî Hâtun bt. Mustafa tarafından husûs-ı âti’l-beyânı ikrâra vekîl olup mezbûrenin zâtını ma‘rifet-i şer‘iyye ile ârifân olan Dilaver Beşe b. Abdullah ve Kapıcızâde demekle şehîr Hacı Mehmed b. Mustafa şehâdetleriyle şer‘an vekâleti sâbite olan Eyüb Çelebi b. Mehmed meclis-i şer‘de işbu bâ‘isü’l-kitâb fahrü’l-akrân Mehmed Ağa b. Yusuf el-Hammâmî mahzarında bi’l-vekâle ikrâr ve takrîr-i kelâm edip müvekkilem mezbûre Ümmühânî Hâtun silk-i mülk-i sıhhatinde münselik olup mahall-i mezbûrede vâki‘ bir tarafı Mahmud Bey b. Abdullah mülkü ve bir tarafı mîrî tarla ve bir tarafı Medîne-i Münevvere -alâ münevverihâ efdalü’s-salât ve ekmelü’t-tahiyye- vakfı ve bir tarafı tarîk-i âm ile mahdûd bir bâb fevkānî oda ve bir sofa ve bir bâb tahtânî oda ve bir sofa ve bir matbah ve bir su kuyusu ve bir kenîf ve sofayı müştemil mülk menzilini, bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık merkūm Mehmed Ağa’ya yirmi bin nakd-i râyic fi’l-vakt akçeye tarafından îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i meşrûh üzre iştirâ ve kabûl ve kabz ve tesellüm eyledikden sonra semeni olan meblağ-ı mezbûr yirmi bin akçeyi müşterî-i mezbûr Mehmed Ağa yedinden tamâmen ahz u kabz eyledim ba‘de’l-yevm menzil-i mahdûd-ı mezbûr merkūm Mehmed Ağa’nın mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-hâmis min şehri Recebi’l-ferd li sene selâse ve seb‘în ve elf.
Şuhûdü’l-hâl: Mehmed Çelebi b. Mustafa, Mahmud Ağa b. Ahmed, Bozacı Yusuf, Mehmed Çelebi b. Hasan, Abdurrahman Çelebi b. Ramazan el-Müezzin, Ahmed Efendi b. Mahmud el-İmâm, Hasan Efendi b. Mustafa el-câbi, Nuh Ağa b. Yusuf, Mehmed, Ali Çavuş b. Hasan, el-Hâc Hasan b. İsmail, Ahmed b. Hasan, Osman b. Mustafa.
|