.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 155
Hüküm no: 90
Orijinal metin no: [8a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Karabaş mahallesi ahalisinden İsmail Efendi b. Mehmed’in cariyesi Gülistan bt. Abdullah’ı azat etttiği

Itâknâme Mahmiye-i İstanbul’da Karabaş mahallesi ahâlîsinden mefharu erbâbi’t-tahrîr ve’l-kalem İsmail Efendi b. Mehmed tarafından ıtk-ı âti’z-zikri ikrâra vekîl olup Ahmed Çelebi b. Ali ve Dilaver Beşe b. Abdullah nâm kimesneler şehâdetleriyle vekâleti sâbite olan el-Hâc Mehmed Beşe b. Mustafa meclis-i şer‘-i hatîr-i lâzımü’t-tevkīrde bi’l-vekâle takrîr-i kelâm edip müvekkil-i müşârün-ileyh İsmail Efendi orta boylu, açık kaşlı, gök gözlü, sarışın hâfızatü’l-vesîka Gülistan bt. Abdullah nâm memlûke câriyesini niyet-i hâlisa ile hasbeten lillâhi’l-aliyyi’l-azîm ve taleben li merzâti’r-Rabbi’r-rahîm malından âzâd ve mülkünden ihrâc ve silk-i harâir-i asliyyâta ilhâk ve idrâc edip min ba‘d merkūme Gülistan sâir harâir-i asliyyât gibi hürre olup üzerinde velâdan gayrı hakkım kalmadı dedi dedikde mâ vaka‘a bi’t-taleb ketb olundu. Fi’l-yevmi’r-râbi‘ min [şehri] Şevvâli’l-mükerrem li sene selâse ve seb‘în ve elf.


Şuhûdü’l-hâl: Hasan Efendi b. Mustafa el-İmâm, Bektaş Çelebi el-Cerrâh, el-Hâc İbrahim b. Dilaver, Keşfî Mustafa Efendi el-Kâtib, Mustafa Çelebi b. Mahmud, Abdi Çelebi b. Hüseyin el-Muhzır.