.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 155
Hüküm no: 91
Orijinal metin no: [8a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Lâleruh bt. Abdullah’ın vakıf arsası üzerine bina ihdasına mütevellîsi Ali Çelebi’nin izin verdiği

Vakıf arsa üzre binâya izin Mahmiye-i İstanbul’da Harâccı Kara Mehmed mahallesi ahâlîsinden hâfızü’l-kitâb Mustafa Beşe b. Murad meclis-i şer‘de takrîr-i kelâm edip mahalle-i merkūmede vâki‘ bir cânibden Meryem Hâtun mülküne ve bir cânibden benim mülküme ve bir cânibden ba‘zan Medîne-i Münevvere vakfına ve ba‘zan Harâccı vakfına ve bir cânibden tarîk-i âma müntehî olup arsası senede üç yüz akçe mukāta‘alı Hoca Dursun vakfı ve binâsı Lâleruh bt. Abdullah nâm hâtunun süknâsı kendiden sonra zevci Hasan Beşe b. Mehmed ve mezbûrun evlâdına meşrût vakfı olan menzil bin yetmiş senesinde vâki‘ harîkde bi’l-külliye muhterik oldukda, vakıfda binâya müsâ‘ade ve vakf-ı mezkûrun hasbî mütevellîsi olan meşrûtun-leh mezbûr Hasan Beşe’de dahi binâya kudreti olmamağla, arsa-i merkūme üzerinde mevcûd olan noksanını semen-i misliyle bey‘ ve semenini irbâh cânib-i vakfa nâfi‘ olmağla mezbûr Hasan Beşe bi’t-tevliyye arsa-i merkūmeden kasr-ı yed edip ol noksanı semen-i misli olan on beş bin akçeye bana bey‘ ve teslîm ve semenini vakıf için kabz eyledikden sonra arsa-i merkūme üzerine müceddeden binâ ihdâs edip mutasarrıf olmak için mütevellîsi olan Ali Çelebi’den istîzân eyledikde ol dahi iznini hâvî işbu temessükü vermiş idi hâlâ ol temessüke nazar olunup mûcebince yedime istihkâmen hüccet verilmesini taleb ederim deyû mazmûnu takrîr-i meşrûhuna mutâbık mezbûr Ali Çelebi’nin imzâ ve hâtemini hâvî izin temessükü ibrâz edip ba‘de’n-nazar istihkâmen işbu hurûf mûcebince ketb ü tahrîr ve yed-i tâlibe def‘ olundu. Fi’l-yevmi’r-râbi‘ min Şevvâli’l-mükerrem li sene selâse ve seb‘în ve elf.


Şuhûdü’l-hâl: Es-Seyyid Mehmed Çelebi b. es-Seyyid Mehmed, Ahmed Çelebi b. Hüseyin el-Yesâri, Ebûbekir Efendi b. Abdurrahman, Receb Efendi b. Süleyman, Hasan Efendi b. Mustafa, Süleyman Çelebi b. Mehmed, Murad Efendi b. Şaban, Abdi Çelebi el-Muhzır, Ahmed Çelebi b. Mahmud kethüdâ-yı muhzırân, Şükrullah Bey b. Mustafa el-Muhzır.