.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 156
Hüküm no: 92
Orijinal metin no: [8a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yani v. Andriye’nin Mora’da Gerbeti karyesi mühimmatı için gönderdiği parayı Yorgi v. Yani’nin teslim ettiği

Kabz-ı meblağ-ı mevkūf Vilâyet-i Rumeli’nde Mora sancağında vâki‘ Kalavrete kazâsına tâbi‘ Gerbeti nâm karye re‘âyâsından Dimo v. Danyal ve Dimitri v. Koni ve Yani v. Nikola ve Yani v. Yorgi ve Nikola v. Aleksandra ve Dimitri v. Palumi ve Pandazi v. İstati ve Panayot v. Todori ve Dimo v. İstati ve Andruco v. Panayot nâm zimmîler meclis-i şer‘de râfi‘ü’l-vesîka Yorgi v. Yani muvâcehesinde her biri takrîr-i kelâm edip karyemiz Vâlide Sultan evkāfından olup işbu merkūm Yorgi evkāf-ı mezbûre re‘âyâsından perâkende olan re‘âyâ üzerine emr-i şerîf ile kethüdâ ta‘yîn olunmağla, karye-i mezbûre re‘âyâsından olup mahmiye-i İstanbul’da Malta nâm mahalde bakkallık ederken hâlik olan Yani v. Andriye hayâtında karyemizin mühimmât-ı lâzımesi için malından ifrâz edip karyemize irsâl oluna deyû ta‘yîn ettiği on bin akçeyi mezbûr Yorgi ahz eylemiş idi hâlâ meblağ-ı mezbûr on bin akçeyi karyemiz mühimmâtı için mezbûr Yorgi kethüdâ yedinden alıp kabz eyledik, meblağ-ı mezbûrdan mezbûr Yorgi kethüdâ yedinde bir akçe ve bir habbe bâkī kalmadı dediklerinde, mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Ramazâni’l-mübârek li sene selâse ve seb‘în ve elf.


Şuhûdü’l-hâl: Şükrullah b. Mustafa, Abdi Çelebi b. Hüseyin, Osman b. Abdullah, Baba Resûl b. Rıdvan.