|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 157 Hüküm no: 93 Orijinal metin no: [8a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Osman b. Ramazan’ın vârisleri Receb Efendi ve Abdi’ye Ali Çelebi b. Hasan’ın borçlu olduğu
İsbât-ı verâset Vilâyet-i Anadolu’da Karahisâr-ı şarkī sancağında Yakubbey kazâsı kurâsından fi’l-asl Uzun Musa nâm karyeden olup ba‘dehû medîne-i Galata’ya tâbi‘ kasaba-i Kasımpaşa’da Küçük Piyâlepaşa mahallesinde sâkin olup mukaddemâ vefât eden Osman b. Ramazan’ın li ebeveyn ammi oğulları olmak üzre verâset iddi‘â eden Receb Efendi ve Abdi ibney Ahmed nâm kimesneler meclis-i şer‘de Ali Çelebi b. Hasan nâm kimesne mahzarında her biri üzerine da‘vâ edip bizim ile gāib ani’l-meclis Bayram b. Muslu nâm kimesne müteveffâ-yı mezbûr Osman’ın li ebeveyn ammi oğlu ve usûbet-i nesebiyye cihetinden hasren vârisleri olup müteveffâ-yı mezbûrun merkūm Ali Çelebi zimmetinde deyn-i şer‘îden olan altı yüz elli bir akçesi hasren bizim ile mezbûr Bayram’a intikāl etmekle meblağ-ı mezbûrdan hissemize isâbet eden dört yüz otuz dört akçeyi mezbûr Ali Çelebi’den taleb ederiz, suâl olunsun dedikde gıbbe’s-suâl mezbûr Ali Çelebi cevâbında müteveffâ-yı mezbûra altı yüz elli bir akçe deyni olduğunu ikrâr ve lâkin mezbûrûnun vech-i muharrer üzre verâsetini inkâr eyledikde müdde‘iyân-ı mezbûrândan müdde‘âsı için beyyine taleb olundukda karye-i merkūme ahâlîsinden olup udûl-i müslimînden Hasan b. Abdi ve Ramazan b. Himmet nâm kimesneler li ecli’ş-şehâde meclis-i şer‘a hâzırân olup gıbbe’l-istişhâdi’ş-şer‘î fi’l-vâki‘ müdde‘iyân-ı mezbûrân Receb Efendi ve Abdi ve mezbûr Bayram müteveffâ-yı mezbûr Osman’ın li ebeveyn ammi oğulları ve usûbet-i nesebiyye cihetinden vârisleri olup verâseti mezbûrûna münhasıradır, bunlardan gayrı vârisi ve terekesine müstahıkk-ı âhar olduğu ma‘lûmumuz değildir,
|