.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 158
Hüküm no: 94
Orijinal metin no: [8a-5]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ahmed Beşe b. Abdurrahman’ın Mehmed b. Mehmed ile Halil Beşe b. Mehmed’den alacaklarını tahsil ettiği

Sulh ve ibrâ Mahmiye-i İstanbul’da Gül Câmi‘i mahallesinde sâkin Ahmed Beşe b. Abdurrahman meclis-i şer‘-i hatîr-i lâzımü’t-tevkīrde kendi tarafından asîl ve gāib ani’l-meclis Mehmed b. Mehmed nâm kimesne tarafından ikrâr-ı âti’z-zikri tasdîke vekîl olup vekâleti Abdülkerim Efendi b. İbrahim ve Hasan Beşe b. Yusuf şehâdetleriyle sâbite olan işbu bâ‘isü’l-kitâb Halil Beşe b. Mehmed mahzarında ikrâr ve takrîr-i kelâm edip mezbûr Halil Beşe zimmetinde cihet-i deyn-i şer‘îden seksen kıt‘a riyâlî guruş ve müvekkil-i mezbûr Mehmed zimmetinde yirmi riyâlî guruş hakkım vardır deyû bundan akdem mezbûrândan da‘vâ ve taleb eylediğimde beynimizde münâza‘ât-ı kesîre vâkı‘a olmuş[du]. El-hâletü hâzihî gāib-i mezbûr zimmetinde olan yirmi guruş mukābelesinde beş guruş ve mezbûr Halil Beşe zimmetinde olan seksen guruş mukābelesinde yirmi beş guruş ki cem‘an otuz guruşu mezbûr Halil Beşe yedinden tamâmen ahz u kabz edip meblağayn-i mezbûreyn da‘vâsından mezbûrân Halil Beşe ve müvekkil-i mezbûr Mehmed’in zimmetlerini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis min Şevvâli’l-mükerrem li sene selâse ve seb‘în ve elf.


Şuhûdü’l-hâl: Abdülkerim Efendi b. İbrahim el-İmâm, Hasan Beşe b. Yusuf, İbrahim Beşe b. Mahmud, Mustafa Beşe b. Mehmed, yağcı İbrahim Beşe, Ali b. Fethullah, Resûl b. Rıdvan, Şükrullah b. Mustafa, Mehmed b. Ramazan.