|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 164 Hüküm no: 107 Orijinal metin no: [9a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Sâliha bt. Abdullah ile oğlu Sâlih Çelebi b. Hüseyin’in verâset davasında sulh olduğu
Sulh Mahmiye-i İstanbul’da Âşık Paşa mahallesi ahâlîsinden olup mukaddemâ vefât eden Mehmed Çelebi b. Abdullah’ın verâseti zevcesi metrûkesi Sâliha bt. Abdullah nâm hâtun ile li ebeveyn kız karındaşı Sâliha Hâtun’un sadrî kebîr oğlu Sâlih Çelebi b. Hüseyin’e münhasıra olup Sâliha Hâtun meclis-i şer‘de tereke-i müteveffâ-yı mezkûra vâzı‘u’l-yed olan mezbûr Sâlih Çelebi mahzarında tav‘an ikrâr edip zevcim mezbûr vefât eyledikde mezbûr Sâlih Çelebi altı bin akçe terekesini kabz ve meblağ-ı mezbûrun dört bin sekiz yüz akçesini mezbûrun techîz ve tekfînine ve sâir levâzım-ı zarûriyyesine harc eyledikde ben dahi kadr-ı ma‘rûfdan ziyâdesini tecvîz etmeyip ziyâdesinden bin beş yüz akçe mehr-i müeccelimi ve rub‘ hissemi mezbûrdan taleb eylediğimde mezbûr dahi mehr-i mezbûrun bin beş yüz akçe olduğunu inkâr edip beynimizde münâza‘ât-ı kesîre vâkı‘a olup muslihûn tavassut etmekle bin beş yüz akçe mehr-i müeccel ile zikr olunan rub‘ hisse-i ma‘lûme da‘vâsında mezbûr ile altı yüz akçe üzerine sulh olup ol dahi sulh-ı mezbûru kabûl ve bedel-i sulh olan altı yüz akçeyi mezbûr yedinden alıp kabz edip tereke-i müteveffâ-yı mezbûra ve gayra müte‘allika cemî‘ da‘vâdan mezbûrun zimmetini ibrâ ve iskāt eyledim dedikde mezbûr Sâlih Çelebi meclis-i şer‘de mezbûre Sâliha Hâtun mahzarında tav‘an ikrâr edip ben dahi müteveffâ-yı mezbûrun terekesinden altmış riyâlî guruş ile bin beş yüz hurda akçe ihfâ eyledin, meblağ-ı mezbûrdan bana intikāl eden üç rub‘ hissemi ver deyû merkūmdan da‘vâ eyledikde ol dahi inkâr edip ben dahi isbâta kādir olmayıp mezbûreye yemîn vermek sadedinde iken vesâtat-ı muslihîn ile da‘vâ-yı merkūmeden mezbûreyi ibrâ ve iskāt eyledim dedikde gıbbe’t-tesâduk mâ vaka‘a bi’t-taleb ketb olundu. Fi’l-yevmi’r-râbi‘ min Şevvâli’l-mükerrem li sene selâse ve seb‘în ve elf.
Şuhûdü’l-hâl: Yusuf Efendi el-İmâm, Hoca Ali Efendi, Hüseyin Çelebi b. Hamza, Sâlih Çelebi b. Mehmed, Şaban Beşe b. Hasan, Mustafa b. Şaban, Mustafa Çelebi el-Muhzır.
|