.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 165
Hüküm no: 108
Orijinal metin no: [9a-6]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Fâtıma bt. Ahmed’in Ahmed b. Mehmed ile sulh olduğu

Sulh Mahmiye-i İstanbul’da Eğrikapı dâhilinde sâkine Fâtıma bt. Ahmed nâm hâtun meclis-i şer‘-i hatîrde zevc-i mutallıkı râfi‘ü’l-kitâb Ahmed b. Mehmed muvâcehesinde bi tav‘ihâ ikrâr ve takrîr-i kelâm edip mukaddemâ mezbûr Ahmed benim zevcim iken beni bırakıp âhar diyâra gitmiş idi hâlâ gelip beni tatlîk ettikde ben dahi bin beş yüz akçe mehr-i müeccelimden ve nafaka-i iddet-i ma‘lûmemden mezbûr Ahmed’in zimmetini ibrâ-i âm-ı kātı‘ü’n-nizâ‘ ile ibrâ ve iskāt eylediğimden sonra mezbûr Ahmed, benden yedinde bir çuka ferâcem ile bir muhayyem ve bir kumaş yastık ve iki velense ve bir çarşaf ve bir sepet sandığı kaldı deyû da‘vâ edip da‘vâ-yı mezbûreden iki bin akçeye benim ile sulh olup sulh-ı mezbûru kabûl ettikden sonra meblağ-ı mezbûru yedimden alıp kabz eyleyip zikr olunan eşyâ da‘vâsından zimmetimi ibrâ-i âm-ı kātı‘ü’n-nizâ‘ ile ibrâ eyledi suâl olunsun dedikde gıbbe’s-suâl mezbûr Ahmed, fi’l-vâki‘ kaziyye bâlâda tasrîh olunduğu üzre olmuşdur deyû mezbûr Fâtıma’nın cemî‘ kelimâtını tahkīk ve tasdîk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Şevvâli’l-mükerrem sene 1073.


Şuhûdü’l-hâl: Hasan Beşe er-Râcil, Ahmed b. Mehmed, Davud b. İbrahim, Ali Beşe Çukadar, el-Hâc Ahmed b. Mahmud, Ahmed Çelebi.