.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 168
Hüküm no: 114
Orijinal metin no: [9b-5]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hoca Sinan vakfına ait iki arsanın Saadet bt. Ahmed’e kiralandığı

Vakıf arsaya müte‘allikadır Mahmiye-i İstanbul’da merhûm Hoca Sinan vakfına hâlâ mütevellî olan Mehmed Çelebi b. Hasan meclis-i şer‘-i hatîr-i lâzımü’t-tevkīrde işbu bâ‘isetü’l-vesîka Saadet bt. Ahmed nâm hâtun mahzarında ikrâr ve takrîr-i kelâm edip mütevellîsi olduğum vakf-ı mezbûrun müştemilâtından olup mahmiye-i mezbûrede Küçükpazar kurbunda Hatîb Muhyiddin mahallesinde vâki‘ üç tarafı vakf-ı mezbûr ve bir tarafı tarîk-i hâs ile mahdûd bir bâb oda icâre-i mu‘accele ve her şehr yirmi beş akçe ücret-i müeccele ile mezbûre Saadet Hâtun’un tasarrufunda iken muhterik olup tûlen yedi zirâ‘ ve arzen beş buçuk zirâ‘ bi hesâb-ı şatrancî otuz sekiz buçuk zirâ‘ arsa-i hâliye kaldıkdan sonra mezbûre Saadet Hâtun arsa-i mezbûre üzerine benim iznim ile bir bâb tahtânî oda binâ etmiş idi hâlâ zikr olunan arsaya muttasıl vakf-ı mezbûrdan tarîk-i hâs cânibinde vâki‘ tûlen altı zirâ‘ ve arzen beş buçuk zirâ‘ bi hesâb-ı şatrancî otuz üç zirâ‘ arsa bu âna değin hâliye ve mu‘attala kalıp bir kimesne ücret ile tâlib olmayıp vakfına bir nesne âid olmamağın, arsa-i mezbûreyi beher mâh onar akçe ecr-i misli ile mezbûre Saadet Hâtun[’a] tevliyyetim hasebiyle îcâr ve teslîm eyledim. Fîmâ ba‘d mezbûre Saadet Hâtun’un kadîmî taht-ı icâresinde olan arsa ile hâlâ zam olunan arsa ki cem‘an yetmiş bir buçuk zirâ‘ arsa-i mevkūfe-i mezbûre beher şehr otuz beş akçe ücret-i müeccele ile mezbûre Saadet Hâtun’un taht-ı icâresindedir dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-hâdî aşer min Şevvâli’l-mükerrem li sene selâse ve seb‘în ve elf.


Şuhûdü’l-hâl: Osman Efendi b. İsmail el-İmâm, Mustafa Çelebi b. Fethullah el-Müezzin, Hüseyin b. Mustafa, Hüseyin b. Ali, İsmail b. Mehmed, Ahmed Halîfe b. Ahmed, Ali Çelebi b. Osman, Oruc Beşe b. Abdurrahman.