.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 172
Hüküm no: 121
Orijinal metin no: [10a-5]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Arakiyeci İbrahim Çelebi b. Ahmed’in Hüseyin Beşe b. Hasan’daki alacağını taksite bağladığı

Taksît Husûs-ı âti’l-beyânı mahallinde tahrîr iltimâs olunmağın kıbel-i şer‘den Mevlânâ Mehmed Efendi irsâl olunup ol dahi mahmiye-i İstanbul’da hâlâ yeniçeri ağası kāimmakāmı olan umdetü’l-emâcid ve’l-ekârim câmi‘ü’l-mehâmid ve’l-mekârim Haseki Mehmed Ağa’nın sâkin oldukları menzile varıp zeyl-i kitâbda mastûrü’l-esâmî olan müslimîn huzûrunda akd-i meclis-i şer‘-i şerîf eyledikde yine mahmiye-i mezbûrede Molla Fenârî mahallesi sükkânından olup hâlâ Dergâh-ı âlî yeniçerilerinin kırk dördüncü cemâ‘atine mahsûs odanın oda başısı olan Arakiyyeci İbrahim Çelebi b. Ahmed meclis-i ma‘kūd-ı mezbûrda, mahrûse-i Galata’ya tâbi‘ kasaba-i Kasımpaşa mahallâtından Emin Hasan Efendi mahallesinde sâkin Hüseyin Beşe b. Hasan mahzarında bi tav‘ihî ikrâr ve takrîr-i kelâm edip mezbûr Hüseyin Beşe zimmetinde cihet-i deyn-i şer‘îden iki bin dört yüz kırk yedi esedî guruş hakkım olup meblağ-ı mezbûrun iki bin yüz kırk yedi guruşunu târih-i kitâbdan üç yüz altmış gün tamâmına değin te’cîl edip bâkī kalan üç yüz esedî guruş ile yine mezbûrun zimmetinde olan bir samur kürk bahâsından yüz seksen guruş ki cem‘an dört yüz seksen esedî guruş hakkımı her otuz günde kırk esedî guruş vermek üzre târih-i mezkûrdan üç yüz altmış gün tamâmına değin taksît edip ol dahi taksît-i mezbûru kabûl ve meblağ-ı mezbûru vech-i muharrer üzre edâya ta‘ahhüd eyledi dedikde gıbbe’t-tasdîki’l-mu‘teber vâki‘ hâli Mevlânâ-yı mezbûr mahallinde tahrîr, ba‘dehû ma‘an irsâl olunan Fazlullah b. Mehmed ile meclis-i şer‘-i hatîre gelip alâ vukū‘ihi ihbâr ve takrîr etmeğin mâ vaka‘a bi’l-ibtigā ketb ve imlâ olundu. Fi’l-yevmi’s-sâlis aşer min Şevvâli’l-mükerrem li sene selâse ve seb‘în ve elf.


Şuhûdü’l-hâl: Mahmud Efendi b. Hasan el-İmâm, Yazıcı Abdülbâkī Çelebi, Mehmed Efendi b. Ahmed el-İmâm, Hacı Yusuf Ağa çavuş-ı Dergâh-ı âlî, Hacı Yusuf Beşe b. Ali, Hasan b. Hüseyin el-Kayyım, Abdullah b. Mehmed el-İmâm, Ömer Beşe b. Mehmed, Mehmed Beşe b. Yusuf, Hasan Beşe b. Mehmed er-Râcil, Mehmed Çelebi b. Ebûbekir seroda [Bölük] 4, Ali Efendi b. Hasan [Bölük] 4, Seyyid Ahmed b. Süleyman, Yorganî İbrahim Çelebi, Yorganî Ramazan Beşe b. Kadri, Osman b. Ahmed el-Müezzin, Hüseyin Beşe seroda [Bölü]k 57, Mehmed b. Ömer.