.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 173
Hüküm no: 122
Orijinal metin no: [10a-6]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mustafa b. Ahmed’in Mehmed b. İlyas’tan alacağına Hüseyin b. Mehmed’in kefil olmadığı

Men‘ Vilâyet-i Anadolu’da kasaba-i Mihaliç’de Yenice mahallesinde sâkin Mustafa b. Ahmed meclis-i şer‘de yine kasaba-i mezbûrede serdâr olan işbu bâ‘isü’l-kitâb Hüseyin b. Mehmed mahzarında üzerine da‘vâ ve takrîr-i kelâm edip mezbûr Hüseyin Beşe kasaba-i mezbûrede serdâr iken bundan akdem gāib ani’l-meclis Mehmed b. İlyas zimmetinde olan üç bin akçe hakkıma mezbûr Hüseyin Beşe târih-i kitâbdan üç sene mukaddem kefîl bi’l-mâl olmuş idi hâlâ kefâleti hasebiyle meblağ-ı mezbûru merkūmdan taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ müdde‘î-i mezbûrun gāib-i merkūm Mehmed zimmetinde olan üç bin akçe hakkına kefîl bi’l-mâl olmadığına mezbûr Hüseyin Beşe’ye yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin müdde‘î-i mezbûr Mustafa Beşe’yi bilâ-beyyine mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’s-sânî aşer min Şevvâli’l-mükerrem li sene selâse ve seb‘în ve elf.


Şuhûdü’l-hâl: Hüseyin b. Abdullah el-Mübâşir, Ali Beşe Çukadar, Baba Resûl b. Rıdvan, Mustafa b. Abdullah.