.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 173
Hüküm no: 123
Orijinal metin no: [10b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mehmed Efendi b. Mustafa’nın el-Hâc Mahmud b. Nasûh’un Hoca Gıyaseddin mahallesindeki arsası üzerine bina ettiği avlu duvarını yıkması gerektiği

Kal‘-ı duvara hüküm Husûs-ı âti’l-beyânı mahallinde istimâ‘ ve tahrîr için gıbbe’l-iltimâs kıbel-i şer‘-i mutahhardan Mevlânâ Keşfî Mustafa Efendi irsâl olunup ol dahi Hâssa mi‘mârlardan üstâd Ahmed b. Ahmed ile mahmiye-i İstanbul’da Hoca Gıyaseddin mahallesinde vâki‘ zikri âtî muhterik vakıf menzil arsasının üzerine varıp zeyl-i vesîkada muharrerü’l-esâmî olan müslimîn huzûrunda akd-i meclis-i şer‘-i şerîf eyledikde mahalle-i mezbûrede vâki‘ merhûm şeyhü’l-harem Mehmed Efendi evkāfından olup iki tarafı vakf-ı mezbûr ve bir tarafı Mehmed Efendi b. Mustafa mülkü ve bir tarafı tarîk-i hâssa müntehî muhterik menzil arsasının icâre-i mu‘accele ve müeccele-i ma‘lûmeteyn ile mutasarrıfı işbu bâ‘isü’l-kitâb el-Hâc Mahmud b. Nasûh nâm kimesne meclis-i ma‘kūd-ı mezbûrda, vakf-ı mezbûr mütevellîsi Kaytas Bey b. Abdullah huzûrunda taht-ı tasarrufumda olan arsa-i mezkûreye muttasıl muhterik mülk menzil arsasının maliki mezbûr Mehmed Efendi muvâcehesinde üzerine da‘vâ ve takrîr-i kelâm edip mezbûr Mehmed Efendi benim tasarrufumda olan tûlen altı zirâ‘ ve arzen bir buçuk zirâ‘ vakf-ı mezbûr arsasını gasb edip kendi mülk arsasına ilhâk eyledikden sonra üzerine havlu duvarı binâ eylemişdir hâlâ mezbûr Mehmed Efendi’den suâl olunup zikr olunan duvarı kal‘ ve kendi mülk arsası üzerine binâ etmeğe tenbîh taleb ederim dedikde gıbbe’s-suâl ve akībe’l-inkâr, müdde‘î-i mezbûrdan müdde‘âsını mübeyyine beyyine taleb olundukda kable’l-harîk mahalle-i mezbûre sükkânından olup hâlâ medîne-i Ebâ Eyyûb el-Ensârî -radiye anhü’l-Bârî- mahallâtından Nişancı Paşa mahallesinde sâkin udûl-i müslimînden Ahmed Çelebi b. Hasan ve mahmiye-i mezbûrede Ali Paşa-yı Atîk mahallesinde sâkin Ali Çelebi b. Halil nâm kimesneler li ecli’ş-şehâde meclis-i ma‘kūd-ı mezbûrda hâzırân olup istişhâd olundukda fi’l-hakīka kable’l-harîk işbu mi‘mâr-ı mezbûr mesâha eylediği tûlen altı zirâ‘ ve arzen bir buçuk zirâ‘ arsa vakf-ı mezbûrun akārâtından olup mezbûrun tasarrufunda iken muhterik olup ba‘de’l-harîk mezbûr Mehmed Efendi gasb edip üzerine işbu duvarı binâ eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinden sonra mûcebince duvar-ı mezkûrun kal‘ı muzır olmamağla kal‘ına mezbûr Mehmed Efendi’ye tenbîh eylediğini Mevlânâ-yı mezbûr mahallinde tahrîr, ba‘dehû ma‘an irsâl olunan İsmail b. Mehmed ile meclis-i şer‘a gelip alâ vukū‘ihi inhâ ve takrîr etmeğin Mevlânâ-yı mezbûrun hükmü tenfîz olunup mâ vaka‘a bi’t-taleb ketb olundu. Fi’l-yevmi’l-âşir min Şevvâli’l-mükerrem li sene selâse ve seb‘în ve elf.


Şuhûdü’l-hâl: El-Hâc Ali b. Resûl, Mehmed Çelebi b. Hüseyin, Mehmed Çelebi b. Osman, Halil Çelebi b. Nasrullah kâtib-i vakf-ı mezbûr, Mehmed Çelebi b. İsmail câbi-i vakf-ı mezbûr, Ahmed b. Hüseyin, Halil b. Ali.