|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 175 Hüküm no: 125 Orijinal metin no: [10b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hacı Osman b. Mustafa’nın menzilini Ayşe Hâtun bt. Abdullah’a sattığı
Mülknâme Mahmiye-i İstanbul’da Akşemseddin mahallesinde sâkin Hacı Osman b. Mustafa meclis-i şer‘-i hatîr-i lâzımü’t-tevkīrde işbu bâ‘isetü’l-kitâb Ayşe Hâtun bt. Abdullah tarafından husûs-ı âti’z-zikri tasdîke vekîl olup bimâ hüve tarîki’s-sübût şer‘an vekâleti sâbite olan Hasan Çelebi b. Abdullah mahzarında ikrâr ve takrîr-i kelâm edip akd-i âtî sudûruna değin mülküm olup mahalle-i mezkûrede vâki‘ bir tarafı İbrahim Efendi mülkü ve bir tarafı Abdi Bey mülkü ve iki tarafı tarîk-i âm ile mahdûd tahtânî iki bâb oda ve bir su kuyusu ve kenîfi ve zât-ı eşcâr-ı müsmire ve gayr-ı müsmireyi müştemil mülk menzili bi cümleti’t-tevâbi‘ ve’l-levâhık müvekkile-i mezbûre Ayşe Hâtun’a yirmi beş bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi minvâl-i muharrer üzre iştirâ ve tesellüm ve kabûl eyledikden sonra, semeni olan meblağ-ı mezbûr yirmi beş bin akçeyi müvekkilem mezbûre Ayşe Hâtun yedinden tamâmen ahz u kabz eyledim ba‘de’l-yevm menzil-i mahdûd-ı mezkûr merkūme Ayşe Hâtun’un mülk-i müşterâsıdır, keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ aşer min Şevvâli’l-mükerrem sene 1073.
Şuhûdü’l-hâl: Ali Efendi b. Mehmed el-İmâm, Mahmud Efendi b. Mustafa el-Müezzin, İbrahim Efendi kâtib-i Kethüdâ Bey, Abdi Çelebi b. Mustafa, Mehmed Efendi, Yusuf Beşe b. Abdullah, Osman Beşe b. Ali, Mehmed Efendi b. el-Hâc İsmail, Satı‘ Beşe.
|