.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 176
Hüküm no: 126
Orijinal metin no: [10b-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ahmed Çelebi b. Mehmed Çavuş’un kendi adına yazdırdığı saka gediğini müvekkilesi Ayşe bt. Mehmed Çavuş için almış olduğu

Saka gediği Mahmiye-i İstanbul’da Ördek Kasap mahallesinde sâkine Ayşe bt. Mehmed Çavuş nâm hâtunun zevci ve tarafından husûs-ı âti’l-beyâna sâbitü’l-vekâle vekîli olan işbu bâ‘isü’l-kitâb Ali Efendi b. Mahmud meclis-i şer‘de müvekkile-i mezbûrenin li ebeveyn karındaşı Ahmed Çelebi b. Mehmed Çavuş mahzarında takrîr-i kelâm edip müvekkilem mezbûre Ayşe bin altmış dokuz senesi Zilhiccesi gurresinde mezbûr Ahmed Çelebi yedine her biri yedişer dirhem olmak üzre üç yüz elli riyâlî guruş teslîm edip vekîlim olup meblağ-ı mezbûr ile bana Kadıçeşmesi’nden bir at sakası gediğini tefevvüz ediver deyû emretmekle ol dahi emrine binâ’en gāib ani’l-meclis el-Hâc Mehmed ve Yusuf nâm kimesnelerin iştirâken tasarruflarında olan at sakası gediğini bir bârgir iki at kırbası ve iki kova ve bir örtüsüyle müvekkilem için tefevvüz edip lâkin zikr olunan gediğin tezkiresini ihrâc eyledikde ol tezkire ferâğ-ı mezbûru kendi nâmına yazdırmışdır hâlâ mezbûrdan suâl olunup takrîri tahrîr olunmak matlûbumdur dedikde gıbbe’s-suâl mezbûr Ahmed Çelebi cevâbında ben mezbûre Ayşe Hâtun tarafından vekâleten meblağ-ı mezbûr ile ol gediği müvekkilem mezbûre için tefevvüz edip lâkin ber minvâl-i mezbûr tezkire-i ferâğ-ı mezbûru kendi nâmıma yazdırdım. Ol gedikle bârgir ve sâir sakaya müte‘allik olan âlâtda alâka ve medhalim yoktur deyû ikrâr etmeğin ikrârı bi’t-taleb ketb olundu. Fi’l-yevmi’s-sânî aşer min Şevvâli’l-mükerrem li sene selâse ve seb‘în ve elf.


Şuhûdü’l-hâl: Mehmed Efendi el-imâm bi câmi‘-i Dülgerzâde, Abdullah Çelebi el-Müezzin, Mustafa Beşe Papuççu, Veli b. Hızır, Mehmed el-saka, Şükrullah Çelebi b. Mustafa, Hasan Beşe b. ( ), Resûl b. Rıdvan.